کەرکوک؛ بانگەشەیەکی جیاواز و ڕێوشوێنی توند
٧ تشرینی یەکەم ٢٠٢٥ - ٧:٥٨ پاش نیوەڕۆ
پەنجەرە
لە کەرکوک بانگەشەی حزب و لایەنە سیاسییەکان جیاوازە و هێزە ئەمنییەکان ڕێوشوێنی توندیان گرتووەتەبەر بۆ ڕێگریکردن لە پێشێلکاریی و دەستدرێژیی لایەنگرانی لایەنەکان بۆ سەر یەکتری.
هێزی ئەمنی و ڕێوشوێنی توند
هێزە ئەمنییەکانی کەرکوک ڕێوشوێنی ئەمنییان گرتووەتەبەر، بەتایبەت لە شەواندا بڵاوە بە هێزەکان دەکرێت و ڕێگە بە پێشێلکاریی نادرێت.
بەپێی بەدواداچوونەکانی پەنجەرە، هێزە ئەمنییەکان ڕێگە بە لایەنگرانی هیچ لایەن و پێکهاتەیەک نادەن فلێکس و پۆستەری یەکتری بدڕێنن.
قەدەغەکراوەکان
بەپێی ڕێوشوێنی هێزە ئەمنییەکان و ڕێنماییەکانی کۆمیسیۆن، ڕێگە بە هیچ لایەن و پێکهاتەیەک نادرێت پۆستەر و فلێکس لە نزیک دەزگا حکومییەکان هەڵبواسێت، تائێستا ئەم ڕێنماییە بە باشی جێبەجێکراوە.
کەمترین پێشیلکاریی
لەکاتێکدا کەرکوک چەقی ململانێی هێز و پێکهاتە جیاوازەکانە و لە ڕابردوودا زۆرترین مشتومڕی سیاسی لەو پارێزگا ڕوویداوە، بەڵام تائێستا کەمترین پێشێلکاریی لە چوارچێوەی بانگەشەی هەڵبژاردندا ڕوویداوە.
هۆکاری ئەمەش بۆ ڕێوشوێنی توندی هێزە ئەمنییەکان و پابەندبوونی لایەنەکان بە ڕێنماییەکانەوە دەگێڕدرێتەوە.