سەرۆکی ڕێکخراوی هیوا بۆ پەنجەرە: ژمارەیەکی زۆر کچی منداڵ لەژێر کاریگەری تۆڕە کۆمەڵایەتییەکان دا شویان کردووە

پەنجەرە

سەرۆکی ڕێکخراوی هیوای عێراقی ئاشکرایکرد، بەشودانی کچان لە تەمەنی منداڵیدا کێشەیەکی گەورەی بۆ دروستکردوون، خستنە بواری جێبەجێکردنی یاسای جەعفەریش کێشەکانیان گەورەتر و قوڵتر دەکاتەوە.

سرود ئەحمەد، سەرۆکی ڕێکخراوی هیوای عێراقی، بە پەنجەرەی ڕاگەیاند: ژمارەیەکی زۆر لە خوێندکارانی کچی قوتابخانە ناوەندییەکانی کەرکوک بەشو دراون و جیا بوونەتەوە، ئەمەش گرفتێکی گەورەیە و بەرۆکی گرتوون.

دەشڵێت: ناکرێت کچە خوێندکاری ناوەندی کە تەنها 13 بۆ 14 ساڵ تەمەنیەتی بەشوو بدرێت و جیاش ببێتەوە، بەتایبەت بەشێک لەو کچانە باوکیان لە ڕووداوە جۆراو جۆرەکاندا لەدەستداوە.

بەپێی وتەی سەرۆکی ڕێکخراوی هیوا، لەمەودوا کێشەکانیان قوڵتر و گەورەتر دەبێتەوە، بەو پێیەی یاسای جەعفەری خراوەتە بواری جێبەجێکردنەوە و ڕێگە بە کچی منداڵ دەدات ژیانی هاوسەرگیری پێکبهێنێت.

سرود ئەحمەد وتی: زۆرێک لەو کچانە لەژێر کاریگەری تۆڕە کۆمەڵایەتییەکان دا هاوسەرگیرییان ئەنجامداوە، بەڵام دواتر هاوسەرگیرییەکانیان شکستی هێناوە.

ڕێکخراوی هیوای عێراقی، ڕێکخراوێکی ناحکومییە و بەرگری لەو کچ و ژنانە دەکات کە توندوتیژییان بەرامبەر ئەنجام دەدرێت، هەروەها ڕاوێژی یاسایی و کۆمەڵایەتی پێشکەش بە ژنان و کچان دەکات.