"بهرژهوهندیی یان بێدهسهڵاتى؟" نهێنی بێدهنگیی عێراق لهئاست سنوربهزاندنهكانى توركیا
٢٩ تشرینی یەکەم ٢٠٢٥ - ٣:٥٣ پاش نیوەڕۆ
پهنجهره
حکومەتی عێراق بێدەنگی هەڵبژاردووە بەرامبەر جموجۆڵە فراوانەکانی سوپای تورکیا لەناوچە شاخاوییەکانی بادینان، بەشێک لە بەرپرسان هۆکارەکەی بۆ ڕازیبوونی عێراق بە جوڵەکانی تورکیا و بەشێکی تر پێیانوایە عێراق توانای ڕاگرتنی تورکیای نییە.
پێشتر تورکیا لە ڕێگەی ئاسمانیەوە هاوکاری دەگەیاندە بارەگاکانی لە ناوچە سنورییەکانی هەرێم، بەڵام لە ئێستادا بەڕێگەی وشکانی و بە بێ ڕاوێژ لەگەڵ حکومەتی هەرێم و عێراق ئەو کارە دەکات.
جموجۆڵەکانی سوپای تورکیا فراوانتر بوون، بە پێی وتەی ڕیکخراوی CPTـى ئەمەریکی، لە ماوەی چەند مانگی ڕابردوو دا 12 خاڵ و بنکەی سەربازییان دروستکردووە و شوێنی فڕین و نیشتنەوەی هیلۆکپەریشیان بۆ ئەو بنکانە بونیادناوە، ئەمە جگە لەوەی لە ڕێگەی بارهەڵگرەوە داری ناوچە شاخاوییەکان بۆ تورکیا دەگوێزنەوە.
فواد حسێن وەزیری دەرەوەی عێراق، لە میانی کۆبوونەوەیدا لەگەڵ ژمارەیەک توێژەر و ڕۆشنبیری کورد، ڕایگەیاندووە: عێراق توانای بەرەنگاربوونەوەی وڵاتانی دراوسێی نییە، بۆیە دەبێت لەڕێگەی سیاسەتی نەرمەوە مامەڵەیان لەگەڵ بکات.
هەرێمی کوردستان لە ڕووی یاسایی، سەربازیی و نێودەوڵەتییەوە ناتوانێت ڕێگری لە جوڵەی سوپای تورکیا بکات، ئەمە جگە لەوەی زۆرجار بەرپرسانی هەرێم بە هەماهەنگی کردن لەگەڵ ئەو وڵاتە تۆمەتبار دەکرێن و ئەوانیش پەنجەی تۆمەت بۆ پەکەکە درێژ دەکەن گوایە پاساویان داوەتە دەست تورکیاوە.
بە پێی ڕێککەوتنی هاوبەشی نێوان ئێران، عێراق و تورکیا، هێزەکانی پاسەوانی سنوری عێراق لە سنورەکان جێگیرکراون، بەڵام ئەو هێزانە نەیانتوانیووە سنور بۆ جموجۆڵی سوپای تورکیا دابنێن.
بە ڕای جەباری یاوەر عێراق "بێ هەڵوێستە" و هۆکارەکەشی "بەرژەوەندیی" نێوان ئەو دوو وڵاتەیە.
لە لێدوانێکی ڕۆژنامەوانیدا، جەباری یاوەر، ئەمینداری پێشووى وەزارەتی پێشمەرگە دەڵێت: ئەو هێزانەی ئێستا لەسەرتاسەری سنورەکانی هەرێم و تورکیا و ئێران جێگیر کراون سەر بە هێزی پاسەوانی سنورن کە سەر بە وەزارەتی ناوخۆی عێراقن، بەڵام عێراق خۆی بێدەنگ کردووە لەئاست ئۆپەراسیۆن و جموجوڵەکانی هێزەکانی تورکیا کە ئەمە پێشێلکردنی سیادەی عێراقە.