لایەنە ئۆپۆزسیۆنەکان نیگەرانییەکان دەبەنە لای سودانی و ئەویش دڵنیاییان پێدەدات
٣١ تشرینی یەکەم ٢٠٢٥ - ٢:٥١ پاش نیوەڕۆ
پەنجەرە
چەند لایەنێکی ئۆپۆزسیۆن نیگەرانییەکانیان لە بوونی دیزاینی پێشوەختەی هەڵبژاردنی عێراق دەگەیەننە سودانی، ئەویش دڵنیاییان پێدەدات و داوای بەردەوامبوونیان لێدەکات.
بەپێی زانیارییەکانی پەنجەرە، چەند لایەنێکی ئۆپۆزسیۆن نیگەرانی خۆیان گەیاندووەتە سەرۆک وەزیرانی عێراق- محەمەد شیاع سودانی، لەبارەی دەنگۆی بوونی دیزاینی پێشوەختە بۆ دەرەنجامی هەڵبژاردنی ئەنجومەنی نوێنەرانی عێراق.
لەبەرامبەردا سودانی دڵنیایی پێداون لەوەی هیچ دیزاینێک لەئارادا نییە و ئەوەی دەوترێت بۆ ساردکردنەوەیانە لە هەڵمەتی هەڵبژاردن، هەربۆیە داوایکردووە بە گەرمی بەردەوام بن لە هەڵمەتەکانیان.
هاوکات سودانی ئەوەشی پێڕاگەیاندوون کە ڕێژەی بایکۆت و بەشداریینەکردن لە هەڵبژاردنەکەدا بەرز دەبێت، هەربۆیە دەبێت لایەنەکان ئەوە لەبەرچاو بگرن.
بڕیارە 11ـی مانگی داهاتوو، هەڵبژاردنی خولی شەشەمی ئەنجومەنی نوێنەرانی عێراق بەڕێوەبچێت، بەهۆی بوونی ئەزموونی پێشتر لە ساختەکاریی و دەستکارییکردنی دەرەنجامەکان، زۆرێک لەلایەنە سیاسییەکان و بەتایبەتی ئەوانەی هەرێمی کوردستان، ترس و دوودڵییان هەیە.