پێکهاتەکانی کەرکوک لەبری ململانێی یەکتر ململانێی ناوخۆیی دەکەن
٧ تشرینی دووەم ٢٠٢٥ - ٢:٣٧ پاش نیوەڕۆ
پەنجەرە
سەرکردەیەکی عەرەبی لە کەرکوک ئاشکرای دەکات ئێستا شێوازی ململانێ لەنێوان پێکهاتەکان گۆڕاوە لە ململانێی دەرەکییەوە بۆ ناوخۆیی.
ئیسماعیل حەدیدیی، بە پەنجەرەی ڕاگەیاند: پێشتر پێکهاتەکانی کەرکوک ململانێیان لەگەڵ یەکترییدا دەکرد، بۆنمونە کورد لەگەڵ عەرەب و تورکمان، عەرەب لەگەڵ تورکمان و کورد و.. هتد.
باسی لەوەشکرد: بەڵام ئێستا ململانێکان گۆڕاون بۆ ناوخۆی خودی پێکهاتەکان.
ڕوونیشیکردەوە: ئێستا کورد لەناو خۆیدا ململانێی هەیە بەتایبەتی پارتی و یەکێتی، عەرەب لەنێوان خۆیاندا ناکۆکییان هەیە بەتایبەتی پارتەکانی تەقەدوم و سیادە، تورکمانیش لەنێوان بەرەی تورکمانی "سونە" و تورکمانی شیعە ململانێ هەیە.
لایخۆشییەوە سەرچاوەیەکی سیاسی لە کەرکوک، وێڕای جەختکردنەوە لەم گۆڕانکارییە لە جۆری ململانێکان، ئەوەی بە پەنجەرە وت: ئەم گۆڕانە پەیوەندیی بە ڕەهەندی ململانێی هەرێمایەتییەوە هەیە.
ڕوونیشیکردەوە: دەستوەردان و بەرژەوەندیی هەریەکە لە تورکیا و ئێران، ڕۆڵی سەرەکی هەیە لە درووستبوونی جەمسەربەندیی جیاواز و درووستبوونی شێوازی ململانێی نوێ.