بەڕێوەبەری ڕۆشنبیری سلێمانی: سلێمانی خەونی میرنیشینی بابانی بەدیهێناوە
١٥ تشرینی دووەم ٢٠٢٥ - ٣:٣٣ پاش نیوەڕۆ
پەنجەرە
بەڕێوەبەری ڕۆشنبیری سلێمانی ڕایدەگەیەنێت، سلێمانی تەنها ٧٧ ساڵ وەک پایتەختی فەرمی میرنشینی بابان بەردەوامدەبێت. بەڵام سلێمانی وەک شار گرنگی خۆی لەدەست نادات، بەڵکو وەک پایتەختی نافەرمی سیاسی و رۆشنبیری و ئەدەبی و چالاکییە جۆراوجۆرەکان دەمێنێتەوە.
د. موحسین ئەدیب، بەڕێوەبەری گشتی ڕۆشنبیری سلێمانی، بە پەنجەرەی ڕاگەیاند: ئەتوانین بڵێین سلێمانی خەونی برایم پاشا و میرەکانی دیش دەهێنێتە دی، تائێستاشی لەگەڵدا بێت بابان لەرێگای سلێمانییەوە، حوکمی زیاتر لەو جوگرافیایە دەکات کە وەختی خۆی ئەو میرنشینە هەژمونی بەسەریدا هەبوە.
دەشڵێت: "ئەمەش گرنگی بوونی شار و گرنگی سلێمانیمان بۆ ڕاڤە دەکات، چالاکییە سیاسی و رۆشنبیرییەکانی سلێمانی لە ١٧٦ ساڵی دوای نەمانی میرنشینی باباندا، لەمڕوەوە باشترین بەڵگەن."