هەنگاوەکانی ئەمەریکا؛ لە فشاری سەر میلیشیا شیعەکانەوە تا پاڵپشتیکردنی پێشمەرگە 

پەنجەرە

هاوکات لەگەڵ فشارەکانی ئەمەریکا بۆ داماڵینی میلیشیا شیعەکانی عێراق لە چەک، بەڵام ئەو وڵاتە هەنگاوێکی پێچەوانەی بەرامبەر هێزەکانی پێشمەرگە گرتووەتەبەر و هەوڵی یەکخستنەوە و ڕێکخستنەوەیان دەدات.

ئەگەر حکومەتی عێراق گیرۆدەی دەست میلیشیا شیعەکان بێت، ئەوا هێزەکانی پێشمەرگە گیرۆدەی دەست یەکێتی و پارتین بەوپێیەی دەستبەرداریان نابن بۆ ئەوەی لەچوارچێوەی هێزێکی سەربازی ڕێکخراو و نیشتیمانیدا یەکبخرێنەوە.

جەبار یاوەر، ئەمینداری پێشووی وەزارەتی پێشمەرگە دەڵێت: ڕێکخستنەوە و یەکخستنەوەی هێزەکانی پێشمەرگە بەس نییە، دەبێت حزب دەستبەرداری ئەو هێزانە ببێت و ڕۆحییەتی نیشتیمانییان تێدا دروست بکرێت.

هەرچەندە بە ڕواڵەت هێزەکانی هەفتای یەکێتی و هەشتای پارتی لە چوارچێوەی دەڤەری یەک و دوودا ڕێکخراونەتەوە، بەڵام هێشتا پارتی و یەکێتی بەسەر ئەو هێزانەدا باڵادەستن.

سەرچاوەیەکی باڵای وەزارەتی پێشمەرگە کە نەیویست ناوی ئاشکرا بکرێت، بە پەنجەرەی ڕاگەیاند: دەبێت سەرجەم هێزەکانی دژە تیرۆری پارتی و یەکێتیش بخرێنە ژێر چەتری وەزارەتی پێشمەرگەوە، بەڵام ناکۆکی سیاسی ڕێگرە لەبەردەم هەنگاوەکانی وەزارەتدا.

هەوڵەکانی ئەمەریکا و هاوپەیمانان بۆ بەنیشتیمانی کردنی هێزەکانی پێشمەرگە و پێشخستنی توانای جەنگییان لەکاتێکدایە، لەئێستادا ئەمەریکا بۆ ڕووبەڕوو بونەوەی تیرۆر لەناوچەکەدا، زیاتر پشت بە دژە تیرۆری ڕۆژئاڤای کوردستان و هێزی ئاڵتونی عێراق دەبەستێت.