سلێمانی و "فوکسترۆت"؛ چیرۆکی باندێک کە جیهانی هەژاندووە

پەنجەرە

لە چەند ڕۆژی ڕابردوودا، ناوی تۆڕی "فوکسترۆت" (Foxtrot) لە میدیاکانی هەرێمی کوردستان و جیهان گەرم بووە، دوای ئەوەی چەند ئەندامێکی دیاری ئەم گروپە لە شاری سلێمانی کەوتنە بۆسەی دەزگا ئەمنییەکانەوە.

ئەم گروپە کە سەرەتا وەک باندێکی بازرگانی ماددەی هۆشبەر لە سوید ناسرا، ئێستا بووەتە کارەکتەرێکی سەرەکی لە کێشە و ململانێ سیاسییەکانی ڕۆژهەڵاتی ناوەڕاست.

"فوکسترۆت" چییە و چۆن کاردەکات؟

تۆڕی "فوکسترۆت" یەکێکە لە مەترسیدارترین گروپە تاوانکارییەکانی وڵاتی سوید.

ئەم گروپە لەلایەن کەسێکەوە بەناوی "ڕەوا مەجید" ناسراو بە "ڕێوی کوردیی" (The Kurdish Fox) سەرکردایەتی دەکرێت، کە کوردێکی ڕۆژهەڵاتی کوردستانە و هەڵگری ڕەگەزنامەی سویدییە.

کارە سەرەکییەکانی ئەم گروپە بریتین لە:

بازرگانی نێودەوڵەتی ماددەی هۆشبەر:
گواستنەوەی بڕێکی زۆری حەشیش و کۆکایین بۆ ناوخۆی ئەوروپا.

تیرۆری جەستەیی:
ئەنجامدانی دەیان کردەی کوشتن و تەقینەوە لە شارە جیاوازەکانی سوید بەهۆی ململانێ لەگەڵ باندە ڕکابەرەکانی وەک گروپی "ڕۆمبا".

سپیکردنەوەی پارە:
بەکارهێنانی کۆمپانیا و وەبەرهێنان بۆ شاردنەوەی سەرچاوەی داراییە نایاساییەکانیان.

بەکرێگرتنی مێردمنداڵان:
ئەم گروپە بەوە ناسراوە کە منداڵانی تەمەن ١٣ بۆ ١٤ ساڵ بۆ ئەنجامدانی تاوانی کوشتن بەکاردەهێنن تاوەکو لە سزای قورسی یاسایی ڕزگاریان بێت.

"جەنگی وەکالەت"؛ پەیوەندی تۆڕەکە بە ئێران و ئیسرائیلەوە

وەرچەرخانە گەورەکە لە دۆسیەی "فوکسترۆت"ـدا کاتێک دەرکەوت کە دەزگای هەواڵگری ئیسرائیل (مۆساد) و دەزگای ئاسایشی سوید (SÄPO) ڕاپۆرتێکی فەرمییان بڵاوکردەوە.

بەگوێرەی ڕاپۆرتەکانی مۆساد، کۆماری ئیسلامی ئێران تۆڕی "فوکسترۆت" و ڕکابەرەکەی "ڕۆمبا"ـی بەکرێ گرتووە بۆ ئەنجامدانی هێرش دژی بەرژەوەندییەکانی ئیسرائیل لە ئەوروپا.

ئەمە شێوازێکی نوێی "جەنگی وەکالەت"ـە کە تێیدا تاران لەبری بەکارهێنانی بریکارە سیاسییەکانی، گروپە مافیاییەکان بەکاردەهێنێت تاوەکو پەنجەی تۆمەتی بۆ درێژ نەکرێت.

ئەو هێرشانەی بەهۆی ئەم پەیوەندییەوە کراون، بریتین لە هێرش بۆ سەر باڵیۆزخانەی ئیسرائیل لە سەرەتای ساڵی ٢٠٢٤، کاتێک نارنجۆکێک هەڵدرایە ناو حەوشەی باڵیۆزخانەی ئیسرائیل لە ستۆکهۆڵم. 

مۆساد دەڵێت ئەمە کارێکی فوکسترۆت بووە بە فەرمانی ئێران، هاوکات بە هێرشکردنە سەر شوێنە جولەکەنشینەکان و بەرژەوەندییەکانی ئیسرائیل لە وڵاتانی تری ئەوروپا.

بۆچی ئێران ئەم گروپە بەکاردەهێنێت؟

ئەم گروپە شارەزاییەکی زۆریان لە کارە نایاساییەکان و دەربازبوون لە چاوی پۆلیس هەیە.

بەپێی سەرچاوە رۆژنامەوانییەکان، بۆ ئێران بەکارهێنانی باندێکی کوردی-سویدی باشترین ڕێگەیە بۆ ئەوەی لە بەرپرسیارێتی نێودەوڵەتی ڕابکات و لە هەمان کاتدا زەبر لە ئیسرائیل بوەشێنێت.

فوکسترۆت لە هەرێمی کوردستان چی دەکەن؟

بەپێی سەرچاوە ڕۆژنامەوانییەکان، ئەم گروپە خاکی هەرێمی کوردستان بۆ  چەند مەبەستێک بەکاردێنێت، لەوانە: خۆحەشاردانی ئەندامەکانیان و دوورخستنەوەیان لەچاوی لایەنە ئەمنییەکانی سوید و ئەوروپا.

جگە لەوەش سودی تریان لە هەرێم بینیوە، لەوانە: سپیکردنەوەی پارەی ڕەش، بەکارهێنانی سیستەمی حەواڵە بۆ گواستنەوەی پارەکانیان لە ئەوروپاوە بۆ هەرێم بەبێ ئەوەی بکەونە ژێر چاودێریی بانکە نێودەوڵەتییەکان.

هەروەها باس لەوەشدەکرێت کە هەر لە هەرێمەوە و لەڕێگەی ئۆنلاینەوە کارە تاوانکارییەکانیان لەناوجەرگەی سویدەوە ئیدارە داوە.

خاڵێکی تریش کە بەهۆکاری بوونی ئەندامی ئەو گروپە لە هەرێمی کوردستان هەژمار دەکرێت، نزیکیی هەرێمە لە ئێران، بەوپێیەی زانیارییەکان باس لەوەدەکەن سەرکردەی گروپەکە "ڕەوا مەجید" لە ئێرانە، پاش ئەوەی لە سوید هەڵهات و هاتە تورکیا و پاشان لەوێشەوە لە ساڵی ٢٠٢٣ هاتوەتە ئێران.

لەنێوان باندی تاوانکاریی و ئەرکی سیاسییدا

"فوکسترۆت" نموونەی ئەو گروپە تاوانکارییانەیە کە سنوورە نیشتمانییەکانیان تێپەڕاندووە و بوونەتە بەشێک لە یارییە گەورە ئەمنییەکانی نێوان وڵاتان.

ئەمەش دەرخەری ئەو ڕاستییەیە کە تاوان چیتر لە سنوور و جوگرافیایەکی دیاریکراودا ناوەستێت.