رێککەوتنی نێوان هەسەدە و دیمەشق؛ لایەنە ئەرێنی و نەرێنییەکانی
٢ شوبات ٢٠٢٦ - ٨:٠٧ پاش نیوەڕۆ
پەنجەرە
بارودۆخی سیاسی رۆژئاوای کوردستان گۆڕانکاری سیاسی خێرای بەخۆوە بینی، دوای ئەوەی رێککەوتن لەنێوان دیمەشق و هەسەدە ئەنجامدرا و تا ئەندازەیەک تورکیا لەهاوکێشەکان دوور خرایەوە.
سەرچاوەیەکی نزیک لە ئیدارەی خۆسەر کە نەیویست ناوی ئاشکرا بکرێت، بە پەنجەرەی ڕاگەیاند: تۆم باراک دواجار بۆ ئەوە سەردانی تورکیای کرد تا دەستوەردان نەکات لە رێککەوتنی نێوان هەسەدە و دیمەشق و ئاڵۆزی دروست نەکات.
سەرچاوەکە دەڵێت: دوای جوڵەی لۆبییەکان و خۆپیشاندانە کاریگەرەکانی کوردستان و وڵاتان، دیمەشق ناچاری رێککەوتن کرا و تورکیاش تاڕادەیەک لە هاوکێشەکان دوور خرایەوە.
بەپێی وتەی سەرچاوەکەی پەنجەرە، گرنگترین خاڵی رێککەوتنەکە مانەوەی کوردە لە سوریا و بەشداری پێکردنیەتی لە دەسەڵاتدا، بەوپێیەی ئیدارەی ناوچە کوردییەکان بە کرداری لەلایەن کوردەوە بەڕێوەدەبرێن و سوریا بەشێوەیەکی سیمبولی لەو ناوچانە بوونی دەبێت.
سەرچاوەکە دەڵێت: لایەنی نەرێنی رێککەوتنەکە رادەستکردنی دەروازە سنورییەکان و نەوتە بە دیمەشق، بەڵام دەبووایە بۆ پاراستنی قەوارە کوردییەکە ئەمە بکرایە.
دەشڵێت: جێکردنەوەی هێزی ژن لە سوریا پێشینەی نەبووە، بۆیە مانەوەی هێزەکانی یەپەژە و جێکردنەوەیان لەناو هێزی سوریا زۆر گرنگبوو.