دوای ١٤ ساڵ کونسوڵخانەی ئەمەریکا لە هەولێر چۆڵ دەکرێت
٥ شوبات ٢٠٢٦ - ٧:٥٧ پاش نیوەڕۆ
پەنجەرە
کونسوڵخانەی گشتی ئەمەریکا لە هەولێر ڕایدەگەیەنێت دوای ١٤ ساڵ بینای کۆنەکەیان لەناو شاری هەولێر چۆڵدەکەن.
لەڕاگەیەنراوێکدا کە وێنەی بۆ پەنجەرە نێردراوە، کونسوڵخانەکە دەڵێت: بەڕێوەبردنی گەڕەکەکە رادەستی شارەوانی و خاوەن ماڵەکان دەکرێتەوە، ئەمەش بەگوێرەی ئەو ڕیککەوتنە دوولایەنیە ئەنجامدرا کە لە مانگی مایسی ٢٠٢٥ واژۆکراوە.
باس لەوەشدەکات لە سەر داوای شارۆچکەی عەنکاوە و بەپێی ڕێککەوتنەکە، کونسوڵخانە ژێرخانی کارەبا و هەندێ شتی تریش وەک پەرژینی ئەمنی و دیواری کۆنکرێتی بۆ بەکارهێنانی شارەوانی بەجێدەهێڵێت.
کونسوڵخانەی ئەمەریکا لە هەولێر بۆ یەکەمجار لەساڵی ٢٠١١ـدا کرایەوە و بیناکەی لە ژمارەیەک خانووی قەزای عەنکاوەـی هەولێردا بوو. پاش ئەوەی کونسوڵخانەکە بینایەکی تایبەت بەخۆی لە ڕێگای مەسیف سەڵاحەدین دروستکرد و لە ڕۆژی ٣ـی کانوونی یەکەمی ٢٠٢٥ بە فەرمی کرایەوە، کاروباری کونسوڵخانەکە بۆ بینا تازەکە گوازرایەوە.