ناوەڕۆکی پەیامەکەی تۆم باراک بۆ لایەنە شیعەکان
٢٨ شوبات ٢٠٢٦ - ٢:٣٩ پێش نیوەڕۆ
پەنجەرە
جارێکی تر تۆم باراک نوێنەری سەرۆکی ئەمەریکا سەردانی بەغدای کرد و لەگەڵ سەرکردەی لایەنە عێراقییەکان گفتوویکرد، هەروەها دیداری لەگەڵ نوری مالیکی کاندیدی سەرۆکوەزیرانی عێراق ئەنجامدا.
سەرچاوەیەکی باڵای لایەنە شیعەکان کە ئاگاداری وردەکاری گفتووگۆکانە، بە پەنجەرەی ڕاگەیاند: ناوەڕۆکی پەیامە یەک لەدوای یەکەکانی باراک بۆ لایەنە شیعەکان لەوەدا کورت دەبێتەوە، ئەگەر حکومەتی داهاتوو رای ئەمەریکای لەسەر نەبێت، گرفت بۆ هەماهەنگی نێوان عێراق و ئەمەریکا دروست دەبێت.
سەرچاوەکە دەڵێت: تۆم باراک ناوی هیچ سەرکردەیەکی نەبردووە، بەڵام هۆشداریداوە لە جێکردنەوەی سەرکردە نزیکەکان لە ئێران لەنێو حکومەتی داهاتوودا و جەختی لەسەر سزادانی عێراق کردووەتەوە.
بەپێی راگەیەنراوێکی نوسینگەی راگەیاندنی نوری مالیکی، مالیکی لەکۆبوونەوەیدا لەگەڵ باراک جەختی لەسەر پێویستی رێزگرتن لە سەروەری عێراق و بژاردەی گەلەکەی کردووەتەوە.