"هێرشیان دەکردە سەر هەرێم ئەمڕۆش هێرش کرایە سەر خۆیان"؛ کەتائیبی ئیمام عەلی کێن؟
١٠ ئازار ٢٠٢٦ - ٧:٢٧ پاش نیوەڕۆ
پەنجەرە
بەرەبەیانی ئەمڕۆ لە ئەنجامی هێرشێکی ئاسمانی بۆ سەر بارەگاکانی گروپی "کەتائیبی ئیمام عەلی" لە دووبزـی کەرکوک، بەپێی زانیارییەکانی پەنجەرە، ٥ چەکدار کوژران و ١٢ـی دیکە برینداربوون.
ئەم لێدانە توندە دوابەدوای ئەو شەپۆلە چڕەی هێرشە درۆنی و مووشەکییانە دێت کە لە ماوەی ١٠ ڕۆژی ڕابردوودا کرانە سەر هەرێمی کوردستان.
کەتائیبی ئیمام عەلی کێن و کاریان چییە؟
ئەم گرووپە باڵی سەربازیی "مقاوەمەی ئیسلامیی عێراق"ـە و لە حوزەیرانی ساڵی ٢٠١٤ دامەزراوە. لە چوارچێوەی دەستەی حەشدی شەعبیدا بە "لیوای ٤٠" دەناسرێن.
گرووپەکە لەلایەن (شەبل زەیدی)ـیەوە سەرپەرشتی دەکرێت و پێشتریش کەسایەتییەکی وەک "ئەبو عەزرائیل" ناوبانگێکی زۆری بۆ پەیدا کردن.
لە ڕووی ئایدیۆلۆژی و سەربازییەوە نزیکایەتییەکی زۆری لەگەڵ فەیلەقی قودسی ئێرانی و حـ..ـیــ.ـزبـ..ـوڵای لوبنانی هەیە، بەڵام جیاواز لە گروپەکانی تر، زیاتر گرنگی بە قۆرخکاریی ئابووری و بازرگانی دەدات.
ڕۆڵیان لە هێرشەکانی سەر هەرێم
لە ماوەی ١٠ ڕۆژی ڕابردوودا، هەرێمی کوردستان (بەتایبەت فڕۆکەخانەی هەولێر، سەربازگەی هەریر و چەند ناوچەیەکی سلێمانی) ڕووبەڕووی زنجیرەیەک پەلاماری فڕۆکەی بێفڕۆکەوان بووەوە.
کەتائیبی ئیمام عەلی وەک بەشێک لە هاوپەیمانیی "موقاوەمەی ئیسلامی لە عێراق" ڕۆڵی سەرەکی و مەیدانی هەبووە لە ئاراستەکردن و هەڵدانی ئەو پۆلە درۆنانە.
هێرشەکەی بەرەبەیانی ئەمڕۆ و کوژرانی ئەو ٤ چەکدارەیان، وەڵامێکی ڕاستەوخۆ و پەرچەکردارێکی هێزەکانی ئەمریکایە بۆ سەرکوتکردنی ئەو سەرچاوە و سەکۆیانەی کە درۆنەکانیان لێوە ئاراستەی هەرێم و بنکەکانی ئەمریکا دەکرێت.
تۆمەت و پێشێلکارییەکانیان
ئەم میلیشیایە خاوەنی مەلەفێکی قورسی پێشێلکارییە لەسەر ئاستی ناوخۆیی و نێودەوڵەتی، بەوهۆیەشەوە لەلایەن وەزارەتی گەنجینەی ئەمریکاوە سەرکردەکەیان (شەبل زەیدی) و گرووپەکەش خراونەتە لیستی تیرۆرەوە.
جگە لە تێوەگلانیان لە تیرۆر، گروپەکە تۆمەتبارە بە قاچاخیکردنی نەوت و سپیکردنەوەی پارە و پارەوەرگرتن و دەستگرتن بەسەر زەوی و پرۆژەی وەبەرهێنان.
هاوکات گرووپەکە بە ئەنجامدانی پێشێلکاریی تائیفی و تاوانی جەنگیش لە تۆمەتبار دەکرێت.