گەڕانەوەی موقتەدا سەدر؛ هاندانی لایەنگرانی بۆ خۆپیشاندان چی پەیامێکی لە پشتەوە بوو؟
٦ نیسان ٢٠٢٦ - ٨:٤٧ پاش نیوەڕۆ
پەنجەرە
لەسەر خۆپیشاندانەکەی رۆژی شەممەی رابردووی لایەنگرانی موقتەدا سەدر گومان لای سیاسییەکانی عێراق دروستبووە، بەوەی خۆپیشاندانەکە پەیامی بۆ ئەمەریکا و وڵاتانی کەنداو لە پشتەوە بێت.
بیانووی موقتەدا سەدر بۆ خۆپیشاندانی لایەنگرانی لە پارێزگاکانی عێراق، سەرکۆنەکردنی هێرشەکانی ئەمەریکا و ئیسرائیل بوو، بەڵام خۆپیشاندانەکان بە ئاڵای عێراقەوە ئەنجامدران و ئەوەی لێخوێنرایەوە کە سەدر دەیەوێت بڵێت:"ئێمە پاڵپشتی شەڕ ناکەین، بەڵام لایەنگری ئێرانیش نین".
بەپێی وتەی سەرچاوەیەکی نزیک لە لایەنە شیعەکان بۆ پەنجەرە، گەڕانەوەی سەدر بۆگۆڕەپانەکە لەمکاتەدا جێی گومانە و ئەوەی لێدەخوێنرێتەوە، بیەوێت پەیام بۆئەمەریکا و کەنداو بنێرێت بەوەی ئەو دەمڕاستی شیعەی عێراقە و دەبێت مامەڵەی لەگەڵدا بکرێت.
گەڕانەوەی سەدر بۆ نێو گۆڕەپانی سیاسی لە سەرووبەندی دۆخی ئاڵۆزی عێراق و ناوچەکە لەکاتێکدایە، ململانێیەکی بەهێزی ژێر بەژێر لەنێو شیعەدا دروستبووە و لایەنەکان دەیانەوێت سود لەو دۆخە نوێیە بۆ تێپەڕاندنی یەکتری وەربگرن.