نزار ئامێدی لە کۆشکی سەلام؛ سەرۆکێکی کەم ئەزموون لەبەردەم ئاڵەنگارییە قورسەکاندا

پەنجەرە

هەڵبژاردنی نزار ئامێدی، وەک سەرۆک کۆماری نوێی عێراق، لاپەڕەیەکی نوێی لە ململانێ سیاسییەکانی نێوان هەولێر و بەغدا و کێبڕکێی نێوخۆیی ماڵی کوردی هەڵدایەوە. ئامێدی کە یەکەمین کەسایەتی دەڤەری بادینانە بگاتە ئەم پۆستە باڵایە، لە کاتێکدا سوێندی یاسایی خواردووە کە ڕێگەکەی بەرەو "کۆشکی سەلام" بە تەلبەندی سیاسی و ڤیتۆی بەشێک لە هێزە کاریگەرەکان دەورەدراوە.

بادینان؛ پۆستێکی باڵا و پێگەیەکی لاواز

هەرچەندە یەکێتیی نیشتمانیی کوردستان دەیەوێت لە ڕێگەی کاندیدکردنی کەسایەتییەکی خەڵکی ئامێدییەوە، پەیامێکی سیاسی بۆ ناوچەی بادینان بنێرێت، بەڵام ئاماژەکان بۆ "بوژانەوەی پێگەی یەکێتی" لەو دەڤەرە گەشبین نین. یەکێتی لە دوایین هەڵبژاردنی پەرلەمانی عێراقدا نەیتوانی هیچ کورسییەک لە بادینان بەدەست بهێنێت. شارەزایان پێیانوایە ئامێدی ناتوانێت ئەم هاوکێشەیە بگۆڕێت، چونکە ئەو بەشێکی زۆری تەمەنی لە دەرەوەی بادینان ژیاوە و وەک "کەسایەتییەکی کۆمەڵایەتیی کاریگەر" لەو ناوچەیە ناناسرێت.

لە سکرتارییەتی مام جەلالەوە بۆ لۆبییەکانی بافڵ تاڵەبانی

سەرچاوەکان ئاماژە بەوە دەکەن کە سەرکەوتنی نزار ئامێدی بۆ ئەم پۆستە، زیاتر لەوەی پەیوەندی بە پێگەی جەماوەرییەوە هەبێت، بەرهەمی نزیکییەتی لە بنەماڵەی تاڵەبانی. 

ئامێدی پێشتر بەرپرسی نووسینگەی جەلال تاڵەبانی بووە و لە ئێستاشدا برایەکی هەمان پۆستی لای لەتیف ڕەشید هەیە. لە لایەکی ترەوە، نزیکیی ئەو لە بافڵ تاڵەبانی، سەرۆکی یەکێتی، رۆڵی سەرەکی هەبوو؛ بەتایبەت کە چەند ساڵێک لەمەوبەر وەک کاندیدی داهاتوو بە ئەمریکییەکان ناسێندرابوو.

بەڵای "ڤیتۆ"؛ پارتی و مالیکی لە بەرەی ناڕازیدا

گەورەترین بەربەست لەبەردەم ئەرکەکانی ئامێدی، هەڵوێستی توندی پارتی دیموکراتی کوردستانە. پارتی وەک هێزی یەکەمی هەرێم، ڕایگەیاندووە کە مامەڵەی لەگەڵدا ناکات. هەرچەندە پێشتر هەمان سیناریۆ لەگەڵ بەرهەم ساڵح دووبارە بووەوە و دواتر ئاسایی بووەوە، بەڵام ئەمجارە دەبێتە هۆی "دەستبەستراویی" ئامێدی لە نێوەندگیریی نێوان هەولێر و بەغدا.

تەنها پارتی نییە؛ بەڵکو نوری مالیکی، وەک سەرکردەیەکی خاوەن هەژموونی شیعە، ناڕەزایەتی بەرامبەر دانانی ئامێدی هەیە، هەرچەندە زۆربەی هێزە شیعەکان پاڵپشتی ئامێدی بوون بۆ گەیشتن بە کۆشکی سەلام.

ئامێدی و تاقیکردنەوەی "کاریزما"

لە نێو سۆشیال میدیا و شەقامی کوردیدا، پرسیارە جەوهەرییەکە ئەوەیە: "ئامێدی چی بۆ هەرێم دەکات؟"

عێراق لەم قۆناغەدا پێویستی بە کەسایەتییەکی کاریزمایە بۆ چارەسەری کێشە کەڵەکەبووەکانی دارایی و وزە، بەڵام رەخنەگران دەڵێن ئامێدی خاوەنی ئەو سیفەتە نییە. جگە لەوە، هەوڵەکان بۆ کاراکردنەوەی جێگرانی سەرۆک کۆمار، مەترسییەکی ترە بۆ سەر کەمکردنەوەی دەسەڵاتە فەرمییەکانی ئەو.

کۆتایی: میراتێکی بێ سوود یان وەرچەرخانێکی نوێ؟

مێژووی دوای مام جەلال نیشانی داوە کە یەکێتی نەیتوانیوە سوودی سیاسی لە پۆستی سەرۆک کۆمار وەربگرێت، جگە لە هەندێک سوودی دارایی و ئیداریی لیواکانی سکرتارییەت. لە کاتێکدا پارتی چاوی لەو پۆستە بوو بۆ لۆبی نێودەوڵەتی، یەکێتی ئێستا نزار ئامێدی خستووەتە بەردەم تاقیکردنەوەیەکی سەخت:

• ئایا دەتوانێت ببێتە نێوەندگیرێکی ڕاستەقینە بۆ چارەسەری کێشەی مووچە و بودجە؟

• یان ئەویش وەک سەرۆکەکانی پێش خۆی، لە پەراوێزی ململانێکاندا دەمێنێتەوە؟

چاوەکان لەسەر "کۆشکی سەلام"ن؛ نزار ئامێدی یان دەبێتە پارێزەری مافە داراییەکانی خەڵک، یان تەنها وەک ژمارەیەک لە لیستی سەرۆک کۆمارەکانی عێراقدا دەمێنێتەوە.