پەنجەرە ناوەڕۆکەکەی ئاشکرا دەکات؛ ئەحمەد شەرع چی بە رابەری بزووتنەوە وتووە؟
١٨ نیسان ٢٠٢٦ - ٨:٠٤ پاش نیوەڕۆ
پەنجەرە
شاندێکی باڵای بزووتنەوەی ئیسلامی بە سەرۆکایەتی عیرفان عەلی عەبدولعەزیز، لەگەڵ ئەحمەد شەرع، سەرۆکی سوریا کۆبوونەوە. لە کۆبوونەوەکەدا دۆسیەی کورد و داڕشتنەوەی سیستەمی سیاسی لە سوریا تەوەرە سەرەکییەکانی گفتوگۆکان بوون.
چوار پێشنیار بۆ سوریای داهاتوو
د. ئارام ئەحمەد، بەرپرسی ئۆفیسی پەیوەندییەکانی بزووتنەوەی ئیسلامی لە ئەنقەرە و ئامادەبووی دیدارەکە، ناوەڕۆکی کۆبوونەوەکەی بۆ پەنجەرە ئاشکرا کرد و ڕایگەیاند کە عیرفان عەبدولعەزیز چوار خاڵی جەوهەریی وەک نەخشەڕێگەیەک بە بیری سەرۆکی سوریادا هێناوەتەوە، کە پێشتر لە نامەیەکدا بۆی ناردبوو. خاڵەکان بریتی بوون لە:
* پاراستنی مافی پێکهاتەکان: لەبەرچاوگرتنی مافە نەتەوەیی و ئاینییەکانی سەرجەم پێکهاتە جیاوازەکانی سوریا.
* نوێکردنەوەی فیقهی سیاسی: وازهێنان لە شێوازە کۆنەکانی حکومڕانی و داڕشتنی فیقهێکی سیاسی نوێ کە بتوانێت لە گۆشەنیگایەکی نیشتمانییەوە وڵات بەڕێوەبەرێت، دوور لە فیقهی سیاسی ڕابردوو.
* پرۆسەی ئاشتی لەگەڵ کورد: خێراکردنی هەنگاوەکان بۆ گەیشتن بە ڕێککەوتنێکی گشتگیر و کۆتاییهێنان بە ململانێکان.
* یەکسانی دەستووری: چەسپاندنی مافی کورد و یەکسانکردنیان لەگەڵ پێکهاتەی عەرەب لە دەستووری نوێی وڵاتدا.
وەڵامی ئەحمەد شەرع: "کورد گەلێکی ڕەسەنە"
بەپێی وتەکانی د. ئارام ئەحمەد، سەرۆکی سوریا ئاماژەی بەوە کردووە کە نامەکەی رابەری بزووتنەوەی ئیسلامی پێگەیشتووە و ناوەڕۆکەکەی بە وردی خوێندووەتەوە. ئەحمەد شەرع لە وەڵامدا ڕایگەیاندووە: "من بە قەناعەتەوە باوەڕم بە چارەسەرکردنی کێشەی کورد هەیە."
هەروەها جەختی کردووەتەوە کە کورد بەشێکی ڕەسەن و دانەبڕاوی گەلی سوریایە و ئامادەیی وڵاتەکەی نیشانداوە کە هەنگاو بە هەنگاو کار بۆ چارەسەرکردنی تەواوی کێشە هەڵپەسێردراوەکان بکەن، بە جۆرێک کە دادپەروەری بۆ هەمووان دەستەبەر بکات.