کێشمەکێشی سودانی و مالیکی؛ کێ سوود لە درێژەکێشانی قەیرانەکە دەبینێت؟

پەنجەرە

بەپێی زانیارییەکانی سەرچاوەیەکی سیاسی ئاگادار لە بەغدا، کێشمەکێشی نێوان لایەنە شیعەکان گەیشتووەتە ئاستێکی قوڵ، ئەمەش دامەزراوە دەستوورییەکانی تووشی ئیحراجی کردووە. 

ململانێی نێوان جەمسەرە شیعەکان وادەی دەستووریی بۆ دیاریکردنی سەرۆکوەزیرانی داهاتووی تێپەڕاندووە و تائێستاش هیچ ئاسۆیەکی ڕوون بۆ چارەسەر نابینرێت.

ئیحراجی یاسایی و پەنابردن بۆ دادگا

سەرچاوەکە بۆ پەنجەرە ئاشکرایکرد کە نزار ئامێدی سەرۆک کۆمار، بەهۆی ڕێکنەکەوتنی لایەنەکان و تێپەڕبوونی وادە یاساییەکان، کەوتووەتە دۆخی ئیحراجییەوە. 
ئاماژەی بەوەشکرد کە ئەگەری هەیە ئامێدی داوای تەفسیر و ڕوونکردنەوە لە دادگای فیدراڵی بکات، بۆ ئەوەی ڕێگەی مامەڵەکردن لەگەڵ ئەم چەقبەستووییە سیاسییە و تێپەڕاندنی وادە دەستوورییەکان دیاری بکرێت.

سودانی و مالیکی؛ ستراتیژیی جیاواز لەناو قەیراندا

لە لایەکی ترەوە، ململانێی ناوخۆیی نێوان لایەنە باڵادەستەکان بە ڕوونی ڕەنگی داوەتەوە:
* محەمەد شیاع سودانی: بەپێی سەرچاوەکە، سودانی خوازیارە دۆخەکە بەم شێوەیەی ئێستا بەردەوام بێت. ئەو وەک دەرفەتێک سەیری ئەم چەقبەستووییە دەکات بۆ ئەوەی زۆرترین کات لە پۆستەکەیدا بمێنێتەوە و پێگەی خۆی بەهێزتر بکات و دەرفەتی مانەوەشی بۆ بێتە پێشەوە.

* نوری مالیکی: سەرۆکی دەوڵەتی یاسا، پلانێکی جیاوازی هەیە. مالیکی لە کۆبوونەوەیەکی تایبەتدا ئاماژەی بەوە کردووە کە "باشترە ئەم دۆخە چەند مانگێک درێژە بکێشێت"؛ ئەمەش بە ئامانجی ئەوەی حکومەتەکەی سودانی ڕووبەڕووی قەیرانی دارایی و بێ پارەیی ببێتەوە و بەو هۆیەوە شکستی بۆ هەمووان دەربکەوێت.

بێدەنگی و بنبەستی سیاسی

سەرچاوە سیاسییەکە جەختی لەوە کردەوە کە لە ئێستادا هیچ دەستپێشخەرییەکی جددی نییە بۆ دەربازبوون لەم قەیرانە. ململانێی نێوان مالیکی و سودانی گەیشتووەتە لووتکە، لە کاتێکدا لایەنە شیعەکانی تری ناو "چوارچێوەی هەماهەنگی" لە بەردەم شەقام و یاسادا هەست بە شەرمەزاری دەکەن و نازانن چۆن مامەڵە لەگەڵ ئەم چەقبەستووییەدا بکەن کە بەرۆکی پڕۆسەی سیاسی گرتووە.