سەرچاوەیەک لە ئەنجومەنی وەزیرانی عێراق بۆ پەنجەرە: لەمەودوا قەیرانی دارایی دەست پێدەکات

پەنجەرە

بەپێی زانیارییەکانی سەرچاوەیەک لە ئەنجومەنی وەزیرانی عێراق بۆ پەنجەرە، وڵات لە بەردەم تاقیکردنەوەیەکی دارایی قورسدایە. 

بەپێی وتەی سەرچاوەکە، سەرەتای قەیرانی دارایی لەمەودوا دەردەکەوێت ، بەڵام بەهۆی ئاڵۆزییەکانی ناوچەکە، وادەی کۆتاییهاتنی قەیرانەکە بە نادیاریی دەمێنێتەوە.

سەرچاوەکەی ئەنجومەنی ئەنجومەنی وەزیران روونیکردەوە، 
دۆخی دارایی عێراق بەهۆی فشاری ناوخۆیی و دەرەکییەوە بەرەو خراپتر بوون دەچێت، وتی: بەهۆی تێکچوونی دۆخی ئەمنیی ناوچەکە، هەناردەکردنی نەوتی عێراق لە ڕێگەی گەرووی هورمزەوە راگیراوە، ئەمەش سەرچاوەی سەرەکیی داهاتی وڵاتی پەکخستووە.

وتیشی: ئەمریکا ناردنی دۆلاری بۆ عێراق ڕاگرتووە و داهاتە دەرەکییەکانی عێراق بە ئاسانی ناگەڕێنەوە ناو وڵات، ئەمەش بووەتە هۆی دروستبوونی کورتهێنان لە نەختینەدا.

سەرچاوەکە ئاماژە بەوە دەکات کە داهاتی خاڵە سنوورییەکان ناگەڕێتەوە بۆ خەزێنەی دەوڵەت و لەلایەن خەڵکانی دەرەوەی دەوڵەتەوە دەبرێن.وتی:”هاووڵاتییان پابەند نین بەدانی تێچووی ئاو و کارەبا، ئەمەش بارگرانییەکی زیاتری خستووەتە سەر حکومەت.

جەختیکردەوە: حکومەتی عێراق لە ئێستادا بەدەست قەرزێکی زۆرەوە دەناڵێنێت، لە کاتێکدا سەرچاوەکانی داهات (نەوت، گومرگ، باج) لە پاشەکشەدان.