سزای لەسێدارەدان بۆ دوو وەزیری پێشووی بەرگریی؛ سەرۆکی چین متمانەی بە ژەنەراڵەکانی نەماوە

پەنجەرە 

لە هەنگاوێکی کەم وێنەدا کە دەنگدانەوەیەکی زۆری لە چین و ناوەندە جیهانییەکاندا دروستکرد، دادگایەکی سەربازیی چین سزای لەسێدارەدانی (بە مەرجی راگرتن) بۆ دوو وەزیری پێشووی بەرگریی ئەو وڵاتە دەرکرد. ئەم بڕیارە وەک توندترین سزا لەچوارچێوەی هەڵمەتی دژە گەندەڵیدا دەبینرێت کە سەرۆک "شی جینپینگ" لە ساڵی ٢٠١٢وە دەستی پێکردووە.

پەیامە توندەکەی سەرۆک بۆ سوپا

لە کۆبوونەوەیەکی یاساداناندا کە چاودێران بە "نیشانەی تەنگژەیەکی قووڵی سیاسی" وەسفی دەکەن، "شی جینپینگ" بە روونی هۆشداری دایە سوپا و رایگەیاند: "نابێت سوپا هیچ کەسێک لەخۆبگرێت کە دڵسۆزییەکی دووفاقانەی بەرامبەر بە حزب هەبێت."

رۆژنامەی "نیویۆرک تایمز" ئاماژەی بەوە کردووە کە ئەم لێدوانە ئاماژەیە بۆ ئەوەی کە سەرۆک متمانەی بەو سەرکردە سەربازییانە نەماوە کە دە ساڵە سەرقاڵی دووبارە بونیادنانەوەیانە. 
پسپۆڕان پێیانوایە بەکارهێنانی دەستەواژەی "دڵی دابەشکراو" لە فەرهەنگی سیاسی چیندا، ئاماژەیە بۆ "ژەنەراڵە خیانەتکارەکان".

ترس لە دووبارەبوونەوەی چارەنووسی "هۆ جینتاو"

دانیال ماتینگلی، پرۆفیسۆر لە زانکۆی "ییڵ"، دەڵێت: "کەس چاوەڕوانی هەڵمەتێکی لەم شێوەیەی لە شی نەدەکرد، وا دەردەکەوێت شتێکی زۆر قووڵ گۆڕابێت." 
بەشێک لە شارەزایان پێیانوایە "شی" دەیەوێت خۆی لە چارەنووسی سەرۆکی پێشوو (هۆ جینتاو) بپارێزێت، کە نەیتوانیبوو دەسەڵاتی تەواوی بەسەر سوپادا هەبێت، بە جۆرێک کە لە ساڵی ٢٠١١دا ژەنەراڵەکان بەبێ ئاگاداری ئەو تاقیکردنەوەی فڕۆکەی جەنگییان ئەنجام دابوو.

گەندەڵی لەناو جومگە هەستیارەکاندا

گەندەڵی مێژوویەکی درێژی لەناو دامەزراوە سەربازییەکانی چیندا هەیە، بەڵام لەم ساڵانەی دواییدا گەیشتووەتە ناو ناوەندی بڕیاری مووشەکە ئەتۆمییەکان. پێشتر لە ساڵی ٢٠١٦دا جێگری سەرۆکی لیژنەی ناوەندی سەربازی سزای زیندانی هەتاهەتایی بەسەردا سەپێنرا، بەڵام سزای لەسێدارەدانی ئەم دوو وەزیرە، قۆناغێکی نوێ و توندتری سزادانە.

کێبڕکێ لەگەڵ واشنتۆن و سەردانەکەی تڕەمپ

ئەم ئاڵۆزییە ناوخۆییانەی سوپای چین لە کاتێکدایە کە کێبڕکێی پەکین و واشنتۆن لە سەردەمی دۆناڵد ترەمپدا گەیشتووەتە لوتکە، بەتایبەت کە ترەمپ بژاردەی سەربازیی دژی ڤەنزوێلا و ئێران بەکاردێنێت. 
هەرچەندە ئاڵۆزییەکانی ئێران کاریگەری هەبووە لەسەر دابینکردنی وزە بۆ چین، بەڵام پەکین دەیەوێت خۆی وەک "هاوبەشێکی جیهانیی جێی متمانە" نیشان بدات لە بەرامبەر سیاسەتە پێشبینی نەکراوەکانی تڕەمپ، کە بڕیارە ئەم هەفتەیە سەردانی پەکین بکات.