دوایین کۆبوونەوەی ئەنجومەنی وەزیرانی هەرێم کەی بوو؟ ماڵپەڕی حکومەت وەڵام دەداتەوە
١٤ ئایار ٢٠٢٦ - ٨:٤٣ پاش نیوەڕۆ
پەنجەرە
بەهۆی بەردەوامیی ناکۆکییەکانی نێوان تیمی پارتی دیموکراتی کوردستان و یەکێتیی نیشتمانیی کوردستان لەنێو حکومەتدا، دانیشتنەکانی ئەنجومەنی وەزیرانی هەرێمی کوردستان تووشی پەککەوتن بووە و ماوەیەکی درێژە هیچ کۆبوونەوەیەکی فەرمی ئەنجام نۆدراوە.
سێ مانگ بێ کۆبوونەوە
بەپێی بەدواداچوونەکان لە ماڵپەڕی فەرمی حکومەتی هەرێمی کوردستان و لاپەڕەی فەرمی مەسرور بارزانی، سەرۆکی ئەنجومەنی وەزیران، دوایین کۆبوونەوەی ئەنجومەنەکە لە ڕێککەوتی ٢٥ی شوبات (٢) ئەنجامدراوە. لەو بەروارەوە تا ئێستا، کە ماوەی دوو مانگ و ٢٠ ڕۆژی ڕەبەق دەکات، هیچ زانیارییەک لەبارەی ئەنجامدانی کۆبوونەوەی نوێ بڵاو نەکراوەتەوە.
دابڕانی سیاسی و حکومی
ئەم دابڕانە درێژخایەنەی تیمی وەزاریی هەردوو حیزبی پێکهێنەری حکومەت، ئاماژەیەکی ڕوونە بۆ قووڵبوونەوەی کێشە سیاسییەکانی نێوان یەکێتی و پارتی، کە ڕاستەوخۆ کارەکانی ئەنجومەنی وەزیرانی پەکخستووە و بووەتە هۆی دروستبوونی جۆرێک لە سستی لە بڕیارە کارگێڕی و باڵاکانی حکومەتی هەرێمدا.