وەرچەرخانی ستراتیژیی؛ چۆن دیمەشقی نوێ پێگەی هەسەدەی لای واشنتۆن لاواز کرد؟

پەنجەرە

دوای ڕووخانی ڕژێمی ئەسەد و گرتنەدەستی دەسەڵات لەلایەن ئەحمەد شەرعەوە، نەخشەی هاوپەیمانێتییەکان لە سووریا گۆڕانکاریی ڕیشەیی بەخۆیەوە بینیوە. لەم نێوەندەدا، پەیوەندییە بەهێزەکەی نێوان ویلایەتە یەکگرتووەکانی ئەمریکا و هێزەکانی سووریای دیموکرات (هەسەدە) قۆناغ بە قۆناغ بەرەو ساردبوونەوە ڕۆیشتووە و ئەو هەماهەنگییە توندوتۆڵەی پێشتر لەنێوانیاندا هەبوو، لە ئێستادا کاڵبووەتەوە یان نەماوە.

لە پارسەنگی هێزەوە بۆ گۆڕانی هاوکێشەکان

لەمێژووی نزیکدا، ئەمریکا بۆ ڕووبەڕووبوونەوەی چەکدارانی داعش سوودێکی زۆری لە هێزەکانی هەسەدە دەبینی، هاوکات ناوچەکانی ژێر کۆنترۆڵی ئەم هێزەی وەک پێگەیەکی گرنگی نفووزی خۆی لە ناوچەکەدا بەکاردەهێنا؛ بەتایبەت لەو سەردەمەی کە بەشێکی زۆری خاکی سووریا لەژێر دەسەڵاتی بەشار ئەسەدی هاوپەیمانی کۆماری ئیسلامی ئێراندا بوو. بەڵام گۆڕانی دەسەڵات لە دیمەشق، ئەم پێویستییە ستراتیژییەی ئەمریکای بە تەواوی گۆڕیی.

دیمەشقی نوێ؛ جێگرەوەیەک کە خواستەکانی واشنتۆن جێبەجێ دەکات

لە ئێستادا حکومەتی نوێی سووریا بە سەرۆکایەتی ئەحمەد شەرع، بووەتە پارێزەری سەرەکی بەرژەوەندییەکانی ئەمریکا لە ناوچەکەدا. ئەم دەسەڵاتە نوێیە نەبووەتە مایەی مەترسی بۆ سەر ئاسایشی ئیسرائیل، و لە هەمان کاتدا ئەرکی شەڕی دژ بە داعشی لەجیاتی ئەمریکا گرتووەتە ئەستۆ.
گرنگترین ئەو هەنگاوانەی دیمەشق ناویەتی و سەرنجی واشنتنی ڕاکێشاوە، بریتین لە:
 لاوازکردنی پێگەی ئێران: کەمکردنەوەی هەژموونی سیاسی و سەربازیی تاران لەناو خاکی سووریادا.
 وەدەرنانی حزبوڵا: دەرپەڕاندنی هێزەکانی حزبوڵای لوبنانی لە تەواوی وڵاتەکەدا.

ئەم گۆڕانکارییانە وایکردووە حکومەتی نوێی سووریا ببێتە جێبەجێکاری ئەو ئەجێندایانەی کە ئەمریکا لە ناوچەکەدا کاری بۆ دەکات، بەمەش پێویستی واشنتۆن بە هێزە ناوخۆییەکانی وەک هەسەدە کەمبووەتەوە.

پاڵپشتی لە حکومەتی ناوەندیی و فەرامۆشکردنی خۆبەڕێوەبەرییەکان

ئیدارەی ئێستای کۆشکی سپی سیاسەتێکی ڕوونی گرتووەتەبەر کە خۆی لە پاڵپشتیکردنی بەهێزکردنی حکومەتی ناوەندیی دیمەشقدا دەبینێتەوە، لە بەرامبەردا جۆرێک لە نەیارێتی یان فەرامۆشکردن بەرامبەر بە دەسەڵاتە خۆبەڕێوەبەرییەکان (لەوانەش ڕۆژئاوای کوردستان) نیشان دەدات.
شیکەرەوەکان پێیان وایە ئەو قورساییە سیاسی و جوگرافییەی کە ئێستا سووریا بۆ ئەمریکای دەکات، بە هێزێکی ناوخۆیی وەک هەسەدە ناکرێت. هەر ئەم هاوکێشە نوێیەش وایکردووە کە پەیوەندییەکانی نێوان کۆشکی سپی و دیمەشق ڕۆژ لەدوای ڕۆژ بەرەو بەهێزبوون بچێت، لە بەرامبەریشدا هاوپەیمانێتی واشنتن لەگەڵ هەسەدە بەرەو قۆناغی لاوازی و سستبوون هەنگاو بنێت.