پەرلەمانتارێک: جووڵەیەک هەیە بۆ ناچارکردنی حکومەت تا پێداچوونەوە بە رێککەوتنی ئەمنیی لەگەڵ ئەمریکادا بکات
١٢ حوزەیران ٢٠٢٦ - ٨:٤٥ پاش نیوەڕۆ
پەنجەرە
حسێن مەهدی، ئەندامی ئەنجومەنی نوێنەرانی عێراق، ئەمڕۆ سێشەممە رایگەیاند کە جووڵەیەکی پەرلەمانی دەستیپێکردووە بۆ فشارخستنە سەر حکومەت بەمەبەستی پێداچوونەوە بە رێککەوتنامەی ئەمنیی نێوان عێراق و ویلایەتە یەکگرتووەکانی ئەمریکا. ناوبراو ئاماژەی بەوە کرد کە ئەم رێککەوتنە چیتر ئەو ئامانجانە ناپێکێت کە لە پێناویدا واژۆ کرابوو.
مەهدی رایگەیاند: "لەبەر رۆشنایی ئەو گۆڕانکاریی و ئاڵنگارییانەی کە ناوچەکە بەخۆیەوەیان دەبینێت، جوڵەیەکی پەرلەمانی هەیە کە ئامانجی فشارخستنە سەر حکومەتە بۆ گرتنەبەری هەنگاوی کرداری سەبارەت بە رێککەوتنامەی ئەمنیی لەگەڵ واشنتۆن."
ئەوان پێیانوایە کە رێککەوتنەکە چیتر بەسوود نییە و لەگەڵ پێداویستییەکانی قۆناغی ئێستادا ناگونجێت، ئەمەش وا دەخوازێت پێداچوونەوەی پێدا بکرێت یان هەڵوێستێکی روونی لێ وەربگیرێت.
لە بەشێکی تری قسەکانیدا، حەسەن مەهدی جەختی کردەوە کە عێراق لە ئێستادا خاوەنی توانا و لێهاتوویی پێویستە بۆ پاراستنی ئاسایش و سەروەریی خۆی، ئەمەش دووبارە هەڵسەنگاندنەوەی سروشتی پەیوەندییەکان و رێککەوتنە ئەمنییەکان دەخوازێت.
لە کۆتاییدا ئاماژەی بەوە کرد کە ئەنجومەنی نوێنەران لە قۆناغی داهاتوودا بەردەوام دەبێت لە تاوتوێکردنی ئەم مەلەفە، بە شێوازێک کە لەگەڵ بەرژەوەندییە باڵاکانی وڵاتدا بگونجێت و سەروەرییەکەی بپارێزێت.