حەشدی شەعبی لە سەردانەکەی سەرۆک وەزیرانی عێراق بۆ واشنتۆن دەترسێت
٢٣ حوزەیران ٢٠٢٦ - ٨:٢٤ پاش نیوەڕۆ
پەنجەرە
سەردانی چاوەڕوانکراوی عەلی زەیدی، سەرۆکوەزیرانی عێراق بۆ ویلایەتە یەکگرتووەکانی ئەمریکا، نیگەرانی و ترسی لای سەرکردەکانی دەستەی حەشدی شەعبی دروستکردووە؛ بەتایبەت لە ئەگەری سەپاندنی مەرجی نوێی واشنتۆن سەبارەت بە داهاتووی حەشد و پەیوەندییەکانی بەغداد لەگەڵ تاران.
حسێن گەرعاوی، سەرکردە لە حەشدی شەعبی، ڕایگەیاند کە پێدەچێت لەم سەردانەدا ئیدارەی ئەمریکا هەوڵی سەپاندنی چەند مەرج و داواکارییەک بەسەر حکومەتی عێراقدا بدات.
ناوبراو ئاماژەی بەوەش کرد، ئیدارەی ئەمریکا هەمیشە کار بۆ ئەوە دەکات سیاسەتەکانی خۆی بەسەر کۆمەڵێک وڵاتدا بسەپێنێت کە عێراقیش یەکێکە لەوانە، ئەمەش تەنیا لەپێناو خزمەتکردنی بەرژەوەندییەکانی خۆیدا.
دۆسیە هەستیارەکانی سەر مێزی گفتوگۆ
بەوتەی گەرعاوی، گفتوگۆکانی نێوان شاندی عێراقی و لایەنی ئەمریکی لە واشنتۆن کۆمەڵێک دۆسیەی یەکلاکەرەوە و هەستیار لەخۆدەگرن، کە گرنگترینیان ئەمانەن:
داھاتووی حەشدی شەعبی: هەوڵەکانی واشنتۆن بۆ لاوازکردن یان کاریگەری دروستکردن لەسەر پێگە و داهاتووی یاسایی و سەربازیی حەشد لە عێراقدا.
دوورخستنەوەی بەغداد لە میحوەری ئێران: گوشارخستنە سەر عێراق بۆ دوورکەوتنەوە لە "میحوەر و بەرەی موقاوەمە.
پەیوەندییەکانی لەگەڵ تاران: داواکاریی ئەمریکا بۆ کەمکردنەوەی ئاستی پەیوەندییە سیاسی و ئابوورییەکانی نێوان عێراق و کۆماری ئیسلامی ئێران.
لە کۆتاییدا، ئەو سەرکردەیەی حەشدی شەعبی جەختی کردەوە کە ئەم بابەتە ستراتیژیانە، تەوەری سەرەکی و نەگۆڕی ناو هەر گفتوگۆیەک دەبن کە لە نێوان شاندی عێراق و بەرپرسانی ئەمریکیدا بەڕێوەبچێت.