هێڵی سوور بەزێندرا؛ ٨٠٪ ی دەستگیرکراوانی ماددەی هۆشبەر گەنجانن
٢٦ حوزەیران ٢٠٢٦ - ٧:٣٠ پاش نیوەڕۆ
پەنجەرە
بەڕێوەبەرایەتیی گشتیی نەهێشتنی مادە هۆشبەرەکانی هەرێمی کوردستان، ئامارێکی نوێ و فەرمی لەبارەی دەستگیرکراوانی پەیوەست بە ماددەی هۆشبەر لە ساڵی ٢٠٢٣وە تاوەکو شەش مانگی یەکەمی ئەمساڵ (٢٠٢٦) ئاشکراکرد. ئامارەکان نیشانی دەدەن کە سەرەڕای توندکردنەوەی ڕێکارەکان، مەترسییەکانی ئەم دیاردەیە بەردەوامن و گەنجان بە پلەی یەکەم کراونەتە ئامانج.
بەرزبوونەوەی ڕێژەی دەستگیرکراوان
بەپێی ئەو داتایانەی خراونەتەڕوو، لە چەند ساڵی ڕابردوودا گۆڕانکاریی بەردەوام لە ژمارەی دەستگیرکراواندا ڕوویداوە:
ساڵی ٢٠٢٣: کۆی گشتیی ٢,٤٨٢ کەس دەستگیرکراون، لەو ژمارەیە ١,٤١٢ کەسیان بەکارهێنەر و ١,٠٧٠ کەسیشیان بازرگانی ماددەی هۆشبەر بوون.
ساڵی ٢٠٢٤ (لە هەولێر و دهۆک): ژمارەی دەستگیرکراوان گەیشتووەتە ١,٥٦٨ کەس، کە پێکهاتبوون لە ٧٢٧ بەکارهێنەر و ٨٣١ بازرگان.
ساڵی ٢٠٢٥ (لە هەولێر و دهۆک): ئامارەکان هەڵکشانێکی بەرچاو نیشان دەدەن و ژمارەکە بەرزبووەتەوە بۆ ١,٧٠٨ دەستگیرکراو، کە ١,٠٣٤یان بەکارهێنەر و ٦٧٤یان بازرگان بوون.
شەش مانگی یەکەمی ئەمساڵ (٢٠٢٦): تەنیا لەم ماوە کورتەدا ٧٤٤ کەس دەستگیرکراون، کە تێیدا ڕێژەی بازرگانان زیاترە و ٤٨٢یان بازرگانی ماددەی هۆشبەر بوون.
سەپاندنی یاسا لەسەر بازاڕ و کۆمپانیاکان
لە پێناو ڕێگریکردن لە دزەکردنی دەرمانی هۆشبەر، ڕێنمایی دراوە بە زیاتر لە ١,٦٠٠ نۆرینگە و دەرمانخانە و بەڵێننامەی پابەندییان لێ وەرگیراوە، لەپاڵ وەرگرتنی بەڵێننامەی یاسایی لە ١١٠ کۆمپانیای گواستنەوە.
گەنجان و ژنان لە نێو بازنەی مەترسیدا
ئامارەکان ئاماژە بە ڕاستییەکی تاڵ دەکەن، گەنجانی تەمەن ١٨ بۆ تەمەن ٤٠ ساڵ زۆرترین ئامانجی بازرگانانی ماددەی هۆشبەرن. بەپێی ڕاپۆرتەکە، %٨٠ی دەستگیرکراوانی ساڵی ٠٢٥ ٢ لەم تەمەنە بوون. هاوکات دیاردەکە ژنانیشی گرتووەتەوە و ڕێژەی ئافرەتان لە نێو دەستگیرکراواندا گەیشتووەتە %٤.