پەنجەرە زانیارییەکانی پشت پەردەی کۆبوونەوەکەی چوارچێوەی هەماهەنگی و کێشەی دەستگیرکردنی بەرپرسان بڵاودەکاتەوە
٦ تەممووز ٢٠٢٦ - ٨:٥٩ پاش نیوەڕۆ
پەنجەرە
سەرچاوەیەکی ئاگادار لە کۆبوونەوەی شەوی ڕابردووی چوارچێوەی هەماهەنگی، چەند زانیارییەکی تایبەتی بە پێگەی پەنجەرە ڕاگەیاند، کە تێیدا گرژی و ناڕەزایەتی لە نێوان ئامادەبوواندا دروستبووە.
بەپێی زانیارییەکانی سەرچاوەکە، لە کۆبوونەوەکەدا کە بە ئامادەبوونی عەلی زەیدی بەڕێوەچووە، چەند سەرکردەیەکی لایەنە شیعەکان نیگەرانی و ناڕەزایەتییان دەربڕیوە لەسەر شێوازی بەڕێوەچوونی هەڵمەتەکانی دەستگیرکردنی بەرپرسان. ئەو سەرکردانە ڕەخنەیان گرتووە لەوەی کە “ئەوان پێشوەختە ئاگاداری ئەو هەڵمەتانە نەبوون” و جەختیان کردووەتەوە کە دەبوو پێشوەختە زانیارییان پێبدرێت.
سەرچاوەکە ئاماژەی بەوەشکرد کە عەلی زەیدی لە وەڵامی ناڕەزایەتیی ئەو سەرکردانەدا ڕایگەیاندووە: هەڵمەتی دەستگیرکردنی بەرپرسان پرۆسەیەکی ئەمنی تەواو نهێنی بووە، ئەگەر پێشوەختە زانیارییەکان ئاشکرا بکرانایە، پرۆسەکە سەرکەوتوو نەدەبوو و ئامانجەکانی نەدەپێکا.
سەرچاوە ئاگادارەکە لە کۆتایی لێدوانەکەیدا دووپاتی کردەوە کە بەهۆی ئەو ململانێ و جیاوازیی بۆچوونانەوە، کۆبوونەوەکەی شەوی ڕابردووی چوارچێوەی هەماهەنگی بێ گرفت نەبووە و چەند گرژییەک لە نێوان ئامادەبوواندا ڕوویداوە.