کچەکەی سەدام حسێن لە یەمەن؛ کێشە دەخاتە نێوان حوسییەکان و هۆزە گەورەکانی یەمەن
٦ تەممووز ٢٠٢٦ - ٩:٠٧ پاش نیوەڕۆ
پەنجەرە
دۆسیەیەکی ناڕوون و پڕ لە مشتومڕ لە یەمەن سەریهەڵداوەتەوە و سەرنجی شەقامی عەرەبی ڕاکێشاوە، دوای ئەوەی ژنێک بە ناوی "میرا" بە ئاشکرا خۆی وەک کچی سەرۆکی پێشووتری عێراق، سەدام حسێن دەناسێنێت و داوا لە هۆزە یەمەنییەکان دەکات بیپارێزن.
لەژێر سێبەری عەلی عەبدوڵڵا ساڵحدا
میرا لە گرتەیەکی ڤیدیۆییدا ڕایگەیاندووە کە بۆ ماوەی چەندین ساڵ لە شاری سەنعای پایتەخت بە نهێنی ژیاوە. بە وتەی خۆی، پرۆسەی حەشارگە و دابینکردنی ئاسایش و نیشتەجێبوونی لەژێر چاودێریی ڕاستەوخۆی سەرۆکی کۆچکردووی یەمەن، عەلی عەبدوڵا ساڵحدا بووە. بەڵام ئەم دۆخە جێگیرە دوای کوژرانی ساڵح لە کۆتایی ساڵی ٢٠١٧دا سەرەوژێر بووەوە.
میرا دەڵێت، دوای ئەو ڕووداوە لە لایەن بازرگانێکی ناسراوی چەک و نزیک لە حوسییەکان بە ناوی "فارس مەنناع" دەست بەسەر خانووەکەیدا گیراوە کە دەکەوێتە شەقامی "سەلامی" لە سەنعا.
لە ڕێڕەوی دادگاوە بۆ تۆمەتی ساختەکاریی
کێشەکە کاتێک ڕەهەندێکی فەرمی و یاسایی وەرگرت کە میرا بۆ وەرگرتنەوەی موڵکەکەی پەنای بردە بەر دامەزراوەکانی دادوەری لە سەنعا. بەڵام دادگای ژێر دەسەڵاتی حوسییەکان لە ساڵی ٢٠٢٣دا تەواوی گێڕانەوەکانی ئەوی ڕەتکردەوە و بە بەڵگەی فەرمی ڕایگەیاند کە ناوبراو ناسنامەی خۆی ساختە کردووە و " ناوی کەسایەتی تر"ی بۆ خۆی بەکارهێناوە.
بەپێی بڕیاری دادگا، دەست بەسەر موڵکەکانیدا گیرا و بۆ ماوەیەک خرایە زیندانەوە پێش ئەوەی ئازاد بکرێت. تەنانەت پشکنینی پزیشکیی (DNA) کە پێشکەشی کردبوو، لە لایەن پسپۆڕانەوە وەک بەڵگەیەکی ساختە و ناڕاست لەقەڵەم درا.
هاوسۆزیی عەشایەریی و قەیرانێکی نوێ
سەرەڕای بڕیارەکەی دادگا، دۆسیەکە لە ڕووی کۆمەڵایەتییەوە دانەخرا. بەشێک لە دانیشتوانی گەڕەکەکەی و لایەنگرانی هێشتا بڕوایان بە چۆنیەتی گێڕانەوەکەی هەیە، ئەوان ئاماژە بە لێکچوونی ڕوخساری ئەو لەگەڵ سەدام حسێن و خێزانەکەیدا دەکەن، جگە لە بوونی چەندین شایەتی کۆمەڵایەتی.
دوای ئەوەی میرا هەستیکرد سەرجەم دەرگا یاساییەکانی لێ داخراون، پەنای بردە بەر نەریتی کۆنی عەشایەری یەمەن. ناوبراو سەردانی هۆزەکانی "دێهم"ی کرد و هانای بۆ شێخ حەمەد بن فەدعەم برد. بەپێی نەریتەکە، تاڵێک لە قژی خۆی وەک هێمایەک بۆ داواکردنی "هاوار و پاراستن" پێشکەش بە شێخ کرد. شێخ بن فەدعەمیش کێشەکەی بردە بەردەم گەورە شێخی هۆزەکانی "بەکێل" بۆ دۆزینەوەی چارەسەرێک.
گرژبوونی دۆخەکە و دەستگیرکردنەوە
ئەم جوڵە عەشایەرییە لە لایەن دەسەڵاتی ئەمنیی سەنعاوە بە توندی وەڵام درایەوە. هێزە ئەمنییەکان شێخ حەمەد بن فەدعەم و پاسەوانەکانیان دەستگیرکرد، هاوکات میراش بۆ جاری دووەم دەستبەسەر کرایەوە.
ئێستا دۆسیەکە گەیشتووەتە بەرزترین ئاستی ئاڵۆزیی، لە لایەکەوە دەسەڵاتی یاسایی و ئەمنی سەنعا جەخت لەسەر ساختەکاریی ژنەکە دەکەنەوە، لە لایەکی ترەوە هۆزەکان خۆیان لەبەردەم تاقیکردنەوەیەکی قورسی نەریتی و کۆمەڵایەتیدا دەبیننەوە.
چاودێران دەپرسن: ئایا کێشەکە لە ڕێگەی دانیشتنی عەشایەرییەوە هێور دەبێتەوە، یاخود یاسا و دادگا قسەی کۆتایی دەکەن؟