لەماڵی ئەفسەرێکدا دەست بەسەر ملیارەها دیناردا گیرا 

پەنجەرە

سەرچاوەیەکی ئەمنی لە پارێزگای ئەنبار ڕایگەیاند، لە کاتی هەڵکوتانە سەر ماڵی ئەفسەرێک لە ناوەڕاستی شاری رومادی، دەست بەسەر بڕە پارەیەکی خەیاڵیدا گیراوە.

سەرچاوەکە وتی: هێزێکی ئەمنی، بەپێی فەرمانی دادوەر، چوونەتە سەر ماڵی ئەفسەرێک لە ناوچەی (شەقامی ٢٠) لە ناوەڕاستی شاری ڕومادی، ئەمەش لەسەر پاشخانی تۆمەتبارکردنی بە تێوەگلان لە دۆسیەکانی گەندەڵی و بەکارهێنانی پۆستەکەی بۆ بەدەستهێنانی بڕە پارەیەکی زۆر.

بەپێی وتەی سەرچاوەکە، هێزە ئەمنییەکە دوای گەمارۆدانی ناوچەکە و داخستنی سەرجەم ڕێگاکان، لە ناو ماڵی ئەفسەرەکەدا دەستیان بەسەر ملیارەها دیناری حەشاردراودا گرتووە.
 
دەشڵێت: سەرجەم پارە دەستبەسەرداگیراوەکە گوازراوەتەوە بۆ لایەنە پەیوەندیدارەکان لە شاری بەغدا.
 
سەرچاوەکە ئاماژەی بەوەش کردووە کە بەپێی لێکۆڵینەوە سەرەتاییەکان، گومان دەکرێت ئەفسەرەکە خاوەنی نووسینگەیەکی ئاڵوگۆڕی دراو بێت و ئەو پارانەش پەیوەندییان بەو چالاکییە داراییانەیەوە هەبێت.