لە تانکی سەر شەقامەکانەوە بۆ هێڵە سورەکان؛ کێ باڵی عەلی زەیدی بەستەوە؟

پەنجەرە

کاتێک عەلی زەیدی بوو بە سەرۆک وەزیرانی عێراق، ویستی بڕیارێکی بەهێز بدات تا پیشانی بدات لە شەڕی گەندەڵیدا جددییە. بۆیە تانکی بردە ناو "ناوچەی سەوز" لە بەغدا و وتی: "هیچ هێڵێکی سورمان نییە و دەست لە هیچ گەندەڵکارێک ناپارێزین، گرنگ نییە پلەکەی چی بێت."

کێشەکە لە کوێوە دەستی پێکرد؟
پاش مانگێک، دەرکەوت شتەکان وەکو ئەوە نەبوون کە زەیدی حسابی بۆ کردبوون.
سەرچاوەکان دەڵێن زەیدی ویستوویەتی پەڕاوی گەندەڵی سەرۆک وەزیرانەکانی پێشووی عێراق هەڵبداتەوە و تەنانەت یەکێکیان بخاتە بەندیخانەوە. بەڵام ڕێککەوتنێکی شاراوە و نەنووسراو لە نێوان هێزە سیاسییەکاندا هەیە کە ڕێگە نادات دەست بۆ سەرۆک وەزیرانەکانی پێشوو و سەرکردە کۆنەکان ببرێت.

سەرچاوەکان دەڵێن: بە زەیدی گوتراوە هەڵمەتەکەی تەنها لەناو وەزارەتی نەوتدا بهێڵێتەوە و نەیباتە دەرەوە.
زەیدی ئێستا لە نێوان دوو گرفتدا گیرۆدەیە، یان مەترسی ئەوەی تیرۆر بکرێت، یاخود حیزبەکان حکومەتەکەی بڕوخێنن و ناچاری بکەن دەست لەکار بکێشێتەوە.

ڕۆڵی ئەمریکا و ئێران چی بوو؟

 زەیدی سەرەتا چووە ئەمریکا، بەرپرسانی ئەمریکی (لەوانە نێردراوی ترەمپ) پێیان وتبوو ئەگەر دارایی گرووپە چەکدارەکان وشک بکات و هەژموونی ئێران کەم بکاتەوە، ئەمریکا وەبەرهێنانی گەورە دەهێنێتە عێراق.
 بەڵام کاتێک زەیدی چووە ئێران، دەرگاکانی بە ڕوودا داخران. ئێران بە گومانەوە سەیری پەیوەندییەکانی زەیدی و ترەمپی دەکرد و ڕێگەی پێنەدا دەست بۆ گرووپە چەکدارەکان یان پرسی هێرشەکان بۆ سەر هەرێمی کوردستان ببات.

بڕیارە قورسەکە (مۆڵەتی ٣٠ی ئەیلوول)

زەیدی مۆڵەتی تا ٣٠ی ئەیلوولی دانابوو بۆ ئەوەی گرووپە چەکدارەکان چەکەکانیان ڕادەستی دەوڵەت بکەن، لە بەرامبەردا هێزە بیانییەکان لە عێراق بکشێنەوە.
بەڵام گرووپە چەکدارەکان ئەم مۆڵەتە بە "تەڵە" دەزانن و ڕەتیدەکەنەوە چەک ڕادەست بکەن.

کۆتایی و ئایندەی حکومەتەکەی

شارەزایانی سیاسی دەڵێن لەگەڵ نزیکبوونەوەی ئەو وادەیە، زەیدی رووبەڕووی تاقیکردنەوەیەکی زۆر مەترسیدار دەبێتەوە. ئەگەر گرووپەکان چەک ڕادەست نەکەن، زەیدی یان دەبێت شەڕیان لەگەڵ بکات یان پاشەکشە بکات. لە هەردوو بارەکەدا بڕیارەکە باجێکی زۆر گەورەی دەبێت و ڕەنگە ببێتە هۆی کەوتنی حکومەتەکەی یان دروستبوونی ئاڵۆزیی گەورە لە عێراقدا.