کۆمیسیۆنی هەڵبژاردنەکان: ماوەی بانگەشەی هەڵبژاردن مانگێک دەبێت
١٩ ئەیلوول ٢٠٢٥ - ٨:٤٨ پاش نیوەڕۆ
پەنجەرە
بەرپرسێک لە کۆمیسیۆنی هەڵبژاردنەکانی عێراق رایدەگەیەنێت ماوەی بانگەشەی هەڵبژاردن بەلای زۆرەوە مانگێک دەبێت و دەستپێکردنیشی چاوەڕێی پەسەندکردنی لیستی پاڵێوراوانە.
د. عیماد جەمیل موحسن، سەرۆکی تیمی راگەیاندنی کۆمیسیۆنی باڵای سەربەخۆی هەڵبژاردنەکانی عێراق، بە پەنجەرەی ڕاگەیاند: هۆکاری دەستنیشاننەکردنی وادەی دەستپێکردنی هەڵمەتی بانگەشەی هەڵبژاردنی ئەنجومەنی نوێنەرانی عێراق، پەیوەستە بە پەسەندکردنی کۆتایی ناوی پاڵێوراوانەوە.
وتیشی: بەلای زۆرەوە ماوەی بانگەشە مانگێک دەبێت و لەمانگی تشرینی یەکەم دەستپێدەکات، بەڵام هێشتا بە دیارییکراویی ڕۆژ و ڕێکەوتەکەیمان دیاریی نەکردووە.
بڕیارە 11ـی تشرینی دووەم (مانگی 11)ـی ئەمساڵ، هەڵبژاردنی خولی شەشەمی ئەنجومەنی نوێنەرانی عێراق بەڕێوەبچێت.