هەرێم لەبەردەم لێشاوی پارەی ساختەدا؛ خەریکە پارەی ساختە جێگەی مادەی هۆشبەر دەگرێتەوە
٢٧ ئەیلوول ٢٠٢٥ - ١٠:١٥ پاش نیوەڕۆ
پەنجەرە
دەزگا ئەمنییەکانی هەرێمی کوردستان جموجۆڵی چڕیان بۆ دەستگیرکردنی ئەو کەسانە دەستپێکردووە کە دراوی ساختە لە بازاڕەکاندا ساغ دەکەنەوە، سەرچاوەیەکی ئەمنیش دەڵێت: بەزۆریی ئەو دراوانە لە ئێرانەوە دەهێنرێن.
بەپێی بەدواداچوونەکانی پەنجەرە، ئەو دراوە ساختە عێراقی و بیانیانەی لە بازاڕەکانی هەرێم دا بڵاو بوونەتەوە، لە ئێرانەوە هاوردە دەکرێن و لە دەروازە سنورییەکانەوە دەهێنرێنە ناوخۆی هەرێم.
زانیارییەکانی پەنجەرە ئاماژەبەوەدەکەن، چەند کەسێک لە شارە کوردییەکانی ڕۆژهەڵاتی کوردستان کارگەی دروستکردنی دراوی عێراقی و دۆلاری ئەمەریکیان داناوە و ئەوان سەرچاوەی ناردنی دراوی ساختەن بۆ هەرێم.
سەرچاوەیەکی باڵای ئەمنی، بە پەنجەرەی ڕاگەیاند: ئەو دۆلارە ساختەی لە بازاڕەکانی هەرێم دا بڵاو بووەتەوە، هەر 10 هەزار (دەفەرێک) دۆلاری بە 4 هەزار (40 گەڵا) دۆلار دەفرۆشرێتە ساختەکارەکان بۆ ئەوەی لە بازاڕدا ساغی بکەنەوە.
سەرچاوەکە دەڵێت: لەلایەن دەزگا ئەمنییەکانەوە ژمارەیەک ساختەکار دەستگیرکراون و دەستیشگیراوە بەسەر بڕێکی زۆر پارەی ساختەدا لەناوچە جیاوازەکان.
لەچەند ڕۆژی ڕابردوودا، پۆلیسی ئیدارەی ڕاپەڕین، هۆشداریی بە هاوڵاتیان دا لە بڵاوبوونەوەی پارەی ساختە و ئاماژەی بەوەکرد دراوی ساختە بە دوکاندار و کاسبکاران دراوە.
لایخۆشییەوە، موقەدەم ئەردەڵان، وتەبێژی بەڕێوبەرایەتی پۆلیسی هەولێر، بە پەنجەرەی ڕاگەیاند: زۆربەی دوکاندار و خاوەن نوسینگەکانی دراو، ئامێری ناسینەوەی دراوی ساختەیان داناوە، دەزگا ئەمنییەکانیش چاودێریی بارودۆخەکە دەکەن.