هێزەکانی ئەمریکا لە هەولێر دەکشێنەوە؛ چەتری بەرگریی لەسەر هەرێم لادەبرێت؟

پەنجەرە

بەپێی راپۆرتێکی مۆنیتەر، سوپای ئەمریکا دەستیکردووە بە کشانەوەی هێزەکانی لە عێراق کە لە نزیک فڕۆکەخانەی هەولێر لە هەرێمی کوردستانی عێراق جێگیر کرابوون.

سەرچاوەکان بێ ئەوەی وردەکاریی زیاتر بخەنە ڕوو، ئاماژەیان بەوە کرد کە سیستەمەکانی بەرگریی ئاسمانیی پاتریۆت (کە مووشەک و درۆن و کەرەستە ئاسمانییەکانی تری دژبەر دەستنیشان دەکەن و دەیانخەنە خوارەوە) لە کۆمەڵگە سەربازییەکە لابراون. 

سەرچاوەکان دەڵێن، کشانەوەکە لە هەفتەی ڕابردووەوە دەستیپێکردووە و بەردەوامە، کە زۆربەی هێزەکانی ئەمریکا و کەرەستە قورسەکانیان براونەتە دەرەوە. ئاماژەیان بەوەشکرد کە سەرجەم پاترییە دژە مووشەکییەکانی پاتریۆت بۆ شوێنێکی نادیار گوێزراونەتەوە، بەڵام تا کاتی بڵاوبوونەوەی ئەم هەواڵە، سیستەمەکانی تری چەکی بەرگری لە شوێنی خۆیان ماونەتەوە.

بەرپرسانی هەرێمی کوردستان کشانەوەکەیان بە پرۆسەیەکی ئاسایی و لە چوارچێوەی پابەندبوونی ئەمریکا بۆ کشانەوەی سەرجەم هێزەکانی لە عێراق تا ٣٠ی ئەیلوول وەسف کرد، کە لەگەڵ بەغدا ڕێککەوتنی لەسەر کرابوو.

بەڵام لەگەڵ ئەوەشدا، لەبەر ئەوەی ئەم کشانەوەیە لە ناوەڕاستی هێرشە بەردەوامەکانی ئێران و میلیشیا شیعییە هاوپەیمانەکانیدا دێت، بەتایبەتی بۆ سەر هەرێمی کوردستانی عێراق، پرۆسەکە وای لە کورد کردووە هەست بە مەترسی و بێبەرگریییەکی زۆر بکەن. 

کاپتن تیم هۆکینس، وتەبێژی فەرماندەیی ناوەندیی ئەمریکا (سێنتکۆم)، ڕەتیکردەوە لێدوان لەسەر هیچ جووڵەیەکی بەردەوامی هێزەکان بدات.
بەرپرسانی حکومەتی هەرێمی کوردستان، وەڵامی داواکاریی مۆنیتەریان بۆ لێدوان نەدایەوە.

ئەگەرچی سیستەمەکانی پاتریۆت بۆ پاراستنی هێزەکانی ئەمریکا جێگیر کرابوون، بەڵام کوردەکانیش قازانجێکی زۆریان لەو چەترە ئەمنییە دەکرد. 
فڕۆکەخانەی هەولێر لە سەرەتای ململانێکانەوە لەگەڵ ئێران لە مانگی شوباتەوە بەردەوام کەوتووەتە بەر هێرشی ئێران و میلیشیا پشتیوانیکراوەکانی. سەرچاوەکان ڕایانگەیاند کە سیستەمە ڕێگریپێکەرەکانی ئەمریکا بە سەرکەوتوویی بەلایەنی کەمەوە ٩٥٪ی ئەو هێرشانەیان تێکشکاندووە.

بەشێکی زۆری هێرشەکانی ئێران و میلیشیاکان بۆ سەر گرووپە چەکدارەکانی ئۆپۆزسیۆنی کوردی ئێران بووە کە لە هەرێمی کوردستان نیشتەجێن. بەڵام کۆمەڵگەی سەربازیی هەولێریش چەندین جار کراوەتە ئامانج. مەودای کارکردنی سیستەمی پاتریۆت لە نێوان ٦٠ تا ١٠٠ میلە.

مایکڵ نایتس، بەرپرسی توێژینەوە لە دامەزراوەی ڕاوێژکاریی "هۆریزن ئینگەیج" لە نیویۆرک، بە مۆنیتەری ڕاگەیاند: "لابردنی پاتریۆتەکان شمشێرێکی دوودەمەیە. لە لایەکەوە بەرگری لە هێزە زەمینییەکان دەکەن، بەڵام لە لایەکی ترەوە خۆیان دەبنە ئامانج. 

کشانەوەی ئەمریکا  بە مانای کۆتایی هاتنی هاوکاریی سەربازیی ئەمریکا و عێراق نایەت، چونکە هێزە تایبەتەکانی ئەمریکا لە شوێنی نەبینراو و شاراوەدا جێگیر کراون.

هێزەکانی ئەمریکا لە عێراق بەهۆی سنووری هاوبەشی عێراق لەگەڵ ئێران و دەستدرێژییە بەردەوامەکانی ئەو گرووپانەی کە ئێران پشتیوانییان دەکات و چالاکانە لە ململانێکەدا بەشدارن و ئامانجەکان لە عێراق و کەنداو دەپێکن، بەتایبەتی کەوتوونەتە بەردەم مەترسی. 
بەپێچەوانەی بەڵێنەکان بۆ کۆنترۆڵکردنی میلیشیا پشتیوانیکراوەکانی ئێران و چەکداماڵین و هەڵوەشاندنەوەیان تا ٣٠ی ئەیلوول، عەلی ئەلزەیدی، سەرۆکوەزیرانی نوێی عێراق تا ئێستا لەو کارەدا سەرکەوتوو نەبووە، وەک لە هێرشەکانی دواییان بۆ سەر کێڵگە نەوتییەکانی سعودیەدا بینرا، کە بووە هۆی ئەوەی سعودیە بە ئاشکرا هاوکاری لەگەڵ هێزەکانی ئەمریکادا بکات بۆ ئەنجامدانی هێرشی تۆڵەسێنەرەوە لە سەرانسەری عێراق لەم هەفتەیەدا.

لابردنی پاتریۆتەکان پێش کشانەوەی هێزە زەمینییەکانی ئەمریکا، پرسیاری زیاتری لەسەر کۆگاکانی مووشەکی ڕێگریپێکەری ئەمریکا و چۆنیەتی ئەولەویەتدانی سوپای ئەمریکا بۆ جێگیرکردنیان بە مەبەستی پاراستنی هێزەکان لە شوێنەکانی تری ناوچەکە دروستکردووە. سەرچاوەیەک کە نەیویست ناوی ئاشکرا بکرێت وتی: "هەرێمی کوردستان ئەولەویەت نییە، بە ڕوونی کەنداو و ئوردن ئەولەویەتن."