سوپای ئێران: "کڵاو سەوزەکان" ١٤ ئۆپەراسیۆنی وشکانییان لە هەولێر و سلێمانی ئەنجام داوە و گەڕاونەتەوە
٧ ئاب ٢٠٢٦ - ٨:٢٨ پاش نیوەڕۆ
پەنجەرە
موجتەبا جەعفەری، ڕاوێژکاری فەرماندەی سوپای ئێران ڕایگەیاند کە یەکەکان لە هێزە تایبەتەکانی ئێران، ١٤ ئۆپەراسیۆنی وشکانییان ئەنجام داوە کە گرووپە چەکدارە دژبەرەکانی ڕژێمی ئێرانی لە هەردوو ناوچەی سلێمانی و هەولێر کردووەتە ئامانج.
ماڵپەڕی هەواڵی ئێرانی «انتخاب» لە زاری جەعفەرییەوە گواستوویەتییەوە، باسی لە چالاکییەکانی سوپای ئێران کرد لە سایەی ڕووبەڕووبوونەوەی وڵاتەکەی بە هێرشەکانی ئەمریکا و ئیسرائیل.
جەعفەری گوتی کە هێزە تایبەتەکانی کۆماندۆ (کڵاو سەوزەکان) ١٤ ئۆپەراسیۆنی وشکانییان لە ناوچەکانی سلێمانی و هەولێر ئەنجام داوە، کە پێگەکانی گرووپە چەکدارە دژبەرەکانی ڕژێمیان کردووەتە ئامانج، بووە هۆی کوژرانی ژمارەیەک لە ئەندامانیان و دیلکردنی ژمارەیەکی تریان.
فەرماندە ئێرانییەکە وتی: ئەو هێزانەی بەشدارییان لەم ئۆپەراسیۆنانەدا کردووە گەڕاونەتەوە بۆ وڵات بێ ئەوەی هیچ زیانێک لە ڕیزەکانیاندا تۆمار بکرێت.