سکرتێری حزبی شیوعی بۆ پەنجەرە: حکومەتی هەرێم تا پێیبکرێت دۆسیەی نەوت ڕادەست ناکات

پەنجەرە

سکرتێری حزبی شیوعی کوردستان وایدەبینێت حکومەتی هەرێم دۆسیەی نەوت بە تەواوەتی ڕادەستی بەغدا ناکات، لەکاتێکدا بەهۆی بێ موچەییەوە بارودۆخی خەڵک زۆر خراپە و خەریکە پەتی ئارامییان دەپچڕێت.

ئەبو کاروان، سکرتێری حزبی شیوعی کوردستان، بە پەنجەرەی ڕاگەیاند: ئاماژەکان دەرخەری ئەوەن حکومەتی هەرێم تاپێیبکرێت دۆسیەی نەوت ڕادەست ناکات، لە یەکێک لە کۆبوونەوەکانی نێوان دەستەی سەرۆکایەتی پەرلەمان و حکومەت، لایەنی حکومەت نەیانشاردەوە تا پێییان بکرێت کۆدی نەوت ڕادەستی سۆمۆ ناکەن.

بەپێی لێکتێگەیشتنی نێوان حکومەتی هەرێم و عێراق، لەبەرامبەر ناردنی موچەی موچەخۆرانی هەرێمدا، دەبێت حکومەتی هەرێم مانگانە 230 هەزار بەرمیل نەوت و بڕی 120 ملیار دیناری داهاتی ناوخۆ ڕادەستی عێراق بکات.

سکرتێری حزبی شیوعی دەڵێت: "ئەم دۆخە ئاماژەیە بۆ شکستی گەورەی حوکمڕانی لە هەرێمی کوردستان، خەڵک ناتوانێت بەبێ موچە و بازاڕ بژی، خەڵک پێیوایە حکومەتی هەرێم توانای هەیە و پارە نادات، بۆیە ئەگەر بیر لە چارەسەرکردنی دۆخەکە نەکرێتەوە، ڕەنگە دۆخێکی نەخوازراو ڕووبدات."

وتیشی: ژیان و گوزەرانی خەڵک زۆر خراپە، چونکە بژێوی خەڵک و جوڵەی بازاڕ گرێدراوە بە موچەوە.

لەکاتێکدا تادێت دۆخی دارایی موچەخۆرانی هەرێمی کوردستان ڕوو لە خراپتر دەکات، بەرپرسانی عێراق و هەرێم یەکتری بە خوڵقاندنی دۆخەکە تۆمەتبار دەکەن.

ئەبو کاروان دەڵێت: "بەغدا و هەرێم هەردوولایان تاوانباری ئەم دۆخەن، دەسەڵاتدارانی هەرێم 33 ساڵە حوکمڕانن و توانای دابینکردنی موچەی مانگێکیان نییە، لەکاتێکدا دارایی کوردستانیان لە بەردەستدایە، ئەمە کەموکورتییەکی گەورەیە."

وتیشی: بەغداش موچەی کردووەتە کارتێکی سیاسی و سەرباری بڕیاری دادگای فیدراڵی، بەڵام هەر وەکو کارت بەکاری دەهێنێت، بۆیە هەردوولایان لەم دۆخە بەرپرسیارن.

بەبڕوای سکرتێری حزبی شیوعی کوردستان، بەرژەوەندی بڕیاربەدەستانی عێراق و هەرێم لە ڕێککەوتندایە و پێویستیان بە یەکترییە، بەڵام وەکخۆی وتی: "لەگەڵ ئەوەشدا ناو بە ناو قەیران دەخوڵقێنن و دواتریش ڕێکدەکەون."

ئەو دەڵێت: لەپاڵ کێشە دروستکردنی ناو بە ناودا، هەندێکجار لە ژێر فشاری ئەمەریکا و وڵاتان یاخود لەژێر ناوی هاوسۆزی بۆ موچەخۆران، موچە دەدرێت؛ لەکاتێکدا موچە مافی خەڵکی کوردستانە.