سوپای ئه‌مریكا ساڵی داهاتوو لە هه‌رێمی كوردستان ده‌كشێته‌وه‌

١٨ ئاب ٢٠٢٥ - ١٠:٠٩ پێش نیوەڕۆ

سوپای ئه‌مریكا ساڵی داهاتوو لە هه‌رێمی كوردستان ده‌كشێته‌وه‌

په‌نجه‌ره‌

بەرپرسانی باڵای عێراق پلانێکی کاتیی دوو قۆناغییان بۆ کشانەوەی تەواوەتی هێزەکانی هاوپەیمانی نێودەوڵەتی بە سەرۆکایەتی ئەمریکا لە سەرتاسەری وڵات ئاشکرا کرد، کە بەپێی پلانەکە، قۆناغی دووەمی کشانەوەکە هەرێمی کوردستان دەگرێتەوە و چاوەڕوان دەکرێت تا مانگی ئەیلوولی 2026، بنکەی سەربازیی هەریر لە هەولێر بە تەواوی چۆڵ بکرێت.


وردەکاریی ڕێککەوتنەکە

بەپێی ئەو لێدوانانەی کە لەلایەن سابت عەباسی، وەزیری بەرگری عێراق و حوسێن عەلاوی، ڕاوێژکاری سەرۆک وەزیرانى عێراقەوە دراون، بەغدا و واشنتۆن گەیشتوونەتە ڕێککەوتنێکی کۆنکرێتی لەسەر خشتەیەکی کاتی بۆ کۆتاییهێنان بە ئەرکی هاوپەیمانان لە عێراق.

پێشتر سابت عەباسی لە چاوپێکەوتنێکیدا لەگەڵ کەناڵی "ئەلحەدەس" له‌ساڵی 2024، ڕایگەیاند: ڕێککەوتن کراوە کە کشانەوەکە لەسەر دوو قۆناغ جێبەجێ بکرێت. 

قۆناغی یەکەم: لە ئەیلوولی 2024 دەستپێدەکات و تا ئەیلوولی 2025 بەردەوام دەبێت. ئەم قۆناغە کشانەوەی هێزەکان لە بەغدا و بنکە سەربازییەکان دەگرێتەوە، کە دیارترینیان بنکەی ئاسمانیی عەین ئەسەدە لە پارێزگای ئەنبار.

قۆناغی دووەم: لە ئەیلوولی 2025 دەستپێدەکات و تا ئەیلوولی 2026 درێژە دەکێشێت. ئەم قۆناغە بە تایبەتی بۆ کشانەوەی هێزەکانە لە خاکی هەرێمی کوردستان، کە تێیدا هێزەکانی ئەمریکا لە بنکەی سەربازیی هەریر لە نزیک هەولێر دەکشێنەوە.

لەلایخۆشیەوە، حوسێن عەلاوی، ڕاوێژکاری سەرۆک وەزیرانى عێراق، پشتڕاستی کردەوە کە ئەرکی هاوپەیمانی نێودەوڵەتی لە بەغدا و بنکەی عەین ئەسەد لە ئەیلوولی 2025 بە فەرمی کۆتایی دێت.

ئاماژەی بەوەشدا قۆناغی دووه‌مى كشانه‌وه‌كان كه‌ هه‌رێمى كوردستان ده‌گرێته‌وه‌، ئه‌یلولی ساڵی داهاتوو به‌ڕێوه‌ده‌چێت.


باکگراوند و لێکەوتەکان

هێزەکانی ئەمریکا و هاوپەیمانان لە ساڵی 2014 و لە چوارچێوەی هەڵمەتی نێودەوڵەتی دژ بە ڕێکخراوی داعش گەڕانەوە عێراق. لە ساڵی 2021 ئەرکی ئەو هێزانە لە "شەڕکەر"ـەوە بە فەرمی گۆڕدرا بۆ "ڕاوێژکاری و یارمەتیدان".

ئەم هەنگاوەی کشانەوە لە کاتێکدایە کە فشاری لایەنە سیاسییە شیعەکان و گروپە چەکدارە نزیکەکان لە ئێران بۆ دەرکردنی هێزە بیانییەکان لە عێراق گەیشتووەتە لوتکە، بەتایبەتی دوای ئەو هێرشە بەردەوامانەی کە کراونەتە سەر بنکە سەربازییەکانی ئەمریکا لە عێراق و سووریا.

بۆ هەرێمی کوردستان، کشانەوەی هێزەکانی ئەمریکا لە بنکەی هەریر، کە وەک ناوەندێکی ستراتیژی بۆ پشتیوانی لۆجستی و ڕاوێژکاری بۆ هێزی پێشمەرگە دادەنرا، قۆناغێکی نوێی ئەمنی دێنێتە ئاراوە. ئەم گۆڕانکارییە پرسیاری جددی لەبارەی داهاتووی هاوکارییە سەربازییەکانی نێوان واشنتۆن و هەولێر و توانای هێزەکانی پێشمەرگە بۆ ڕووبەڕووبوونەوەی هەڕەشە ئەمنییەکان، بەتایبەتی پاشماوەکانی داعش، دروست دەکات.


دواین پێشهات

زۆرترین خوێنراو