ئایا سلێمانی هه‌ر خۆی ده‌بێت یاخود ده‌بێته هه‌ولێر و بادینان؟
٦ ئەیلوول ٢٠٢٥ - ٨:٥٩ پاش نیوەڕۆ
په‌نجه‌ره
سلێمانی، ئه‌و شارەی كه ماوه‌یه‌كی زۆر وه‌ك سیمبولی ئازادیی و پێشكه‌وتنی خزمه‌تگوزاریی سه‌یر ده‌كرا، ئێستا له‌به‌رده‌م پرسیارێكی گه‌وره‌دایه: به‌ره‌و كوێ ده‌چێت؟ ئایا ده‌بێته هه‌ولێرێكی تری پڕ له پێشكه‌وتنی بیناسازیی و سه‌رمایه‌گوزاریی، یان به‌ره‌و بارودۆخێك ده‌ڕوات كه هاوشێوه‌ی بادینان بێت له ڕووی سه‌ركوتكردنی ئازادییه‌كان؟
یادگارییه‌كانی 2005: كاتێك سلێمانی پێشه‌نگ بوو
ده‌گه‌ڕێینه‌وه بۆ ساڵی 2005، سه‌رده‌می گه‌رمی بانگه‌شه‌كانی هه‌ڵبژاردنی ئه‌نجومه‌نی پارێزگای هه‌ولێر. له‌و كاته‌دا، یه‌كێتی نیشتمانی كوردستان، وه‌ك یه‌كێك له لایه‌نه سه‌ره‌كییه‌كانی گۆڕه‌پانه‌كه، ته‌وه‌ری بانگه‌شه‌كه‌ی له‌سه‌ر ئه‌و دروشمه بنیات نابوو كه "هه‌ولێر ده‌كه‌ینه سلێمانی".
ئه‌م دروشمه، نیشانه‌یه‌كی ڕوونی ئه‌و ڕاستییه بوو كه له‌و سه‌رده‌مه‌دا، سلێمانی له ڕووی خزمه‌تگوزاریی، ئاوه‌دانیی، جوانی شار و ژێرخانه‌وه، پێشه‌نگ و مایه‌ی شانازیی بوو.
هه‌ولێر، پایته‌ختی هه‌رێم، هێشتا له قۆناغه‌كانی سه‌ره‌تایی گه‌شه‌سه‌ندندا بوو، به‌ڵام سلێمانی به سیمای شارێكی مۆدێرن و خاوه‌ن خزمه‌تگوزارییه به‌رزه‌كان ده‌ناسرا. خه‌ڵكی چاوه‌ڕێی ئه‌وه بوون كه هه‌ولێریش به‌و ئاراسته‌یه بڕوات.
گۆڕانی هاوسه‌نگی: هه‌ولێر سه‌رده‌كه‌وێت
به‌ڵام كات و ڕۆژگار، گۆڕانكارییه‌كانی له‌گه‌ڵ خۆیدا هێنا. ئێستا دوای نزیکەی دوو دەیە، ئه‌و هاوسه‌نگییه به ته‌واوی گۆڕاوه.
هه‌ولێر له ڕووی گه‌شه‌ی ئابووری، بیناسازیی مۆدێرن، پڕۆژه گه‌وره‌كانی ژێرخان، وه‌به‌رهێنان و ئاوه‌دانییه‌وه، به‌شێوه‌یه‌كی بێوێنه پێشكه‌وتووه. شاره‌كه بووه‌ته ناوه‌ندێكی بازرگانیی و ئابووریی چالاك، سه‌رنجی وه‌به‌رهێنه‌رانی ناوخۆیی و بیانی ڕاكێشاوه.
سلێمانی نه‌یتوانیوه به هه‌مان خێرایی و كوالێتی هه‌ولێر پێش بكه‌وێت
له به‌رامبه‌ردا، سلێمانی له هه‌ندێک سێكته‌ردا له پاشه‌كشه‌دایه، یان لانیکه‌م نه‌یتوانیوه به هه‌مان خێرایی و كوالێتی هه‌ولێر پێش بكه‌وێت. ئه‌م گۆڕانكارییه وا ده‌كات پرسیار له‌سه‌ر هۆكاره‌كانی پاشه‌كشه‌ی سلێمانی و سه‌ركه‌وتنی هه‌ولێر بكرێت.
ئازادییه‌كان: له سیمبولی سلێمانییه‌وه بۆ مه‌ترسییه‌كانی ئێستا
جگه له خزمه‌تگوزاریی و ئاوه‌دانیی، سلێمانی هه‌میشه شانازیی به بوونی ئازادییه‌كانه‌وه ده‌كرد. ئازادیی كاری سیاسیی، ڕۆژنامه‌وانیی، ڕاده‌ربڕین و چالاكییه‌كانی كۆمه‌ڵگه‌ی مه‌ده‌نی، وه‌ك خاڵی جیاكه‌ره‌وه‌ی سلێمانی سه‌یر ده‌كران. یه‌كێتی، وه‌ك حیزبی ده‌سه‌ڵاتداری سلێمانی، ئه‌مه‌ى وه‌ك شانازیی سه‌یر ده‌كرد و به‌رده‌وامیش ڕه‌خنه‌ی له پارتی دیموكراتی كوردستان ده‌گرت سه‌باره‌ت به سنوورداركردنی ئازادییه‌كان له سنووری ژێر ده‌سه‌ڵاتی خۆی.
ئه‌وسا و ئێستاش، ئه‌وه‌ى ڕووبه‌ڕووى پارتى ده‌كرێته‌وه وه‌كو ڕه‌خنه و یه‌كێتیش به‌شێك بوو له‌وانه‌ى ئاڕاسته‌ى ده‌كرد و ده‌كات، بریتییه له "داپڵۆسین و توندوتیژییه‌كانی به‌رامبه‌ر به‌وانى تر"، له‌نمونه‌ى سوتاندنى باره‌گاكانى یه‌كگرتوو و گۆڕان، داخستنى په‌رله‌مان، تیرۆری ڕۆژنامه‌نووسان، ده‌ستگیركردنى چالاكوان و ڕۆژنامه‌نووسان و له زیندان نانیان و... هتد.
گۆڕانی ڕۆڵه‌كان: ئایا سلێمانی به‌ره‌و هه‌مان ڕێچكه ده‌ڕوات؟
ئه‌وه‌ی جێگه‌ی سه‌رسوڕمان و نیگه‌رانییه، ئه‌وه‌یه كه له‌ماوه‌ى چه‌ند ساڵێكدا یه‌كێتی نیشتمانی كوردستان له ناوچه‌كانی ژێر ده‌سه‌ڵاتی خۆی له سلێمانی، هه‌مان ئه‌و ڕه‌خنانه‌ی ڕووبه‌ڕوو ده‌بێته‌وه كه پێشتر خۆی ئاڕاسته‌ی پارتی ده‌كرد.
ده‌ستگیركردنى سه‌ركرده ئۆپۆزسیۆنه‌كان، هێرشكردنه سه‌ر باره‌گاى به‌ره‌ى گه‌ل (لاله‌زار) و ده‌ستگیركردنى سه‌رۆكه‌كه‌ى به شه‌ڕ و به‌كارهێنانى چه‌كى قورس و جۆراوجۆر، دواتریش هه‌ڕه‌شه له سه‌نته‌ری میترۆ كه له دێرینترین سه‌نته‌ره‌كانى داكۆكییه له ئازادییه گشتییه‌كان و ڕۆژنامه‌نووسان، به‌هه‌مان بارودۆخدا ده‌ڕوات كه پێشتر وه‌ك نموونه‌ی سنوورداركردنی ئازادییه‌كان له زۆنی زه‌رد ئاماژه‌ی پێده‌كرا.
داهاتوو له نێوان مژده و مه‌ترسییدا
سلێمانی له‌به‌رده‌م قۆناغێكی هه‌ستیاردایه. ئاینده‌ی ئه‌م شاره، نه‌ك ته‌نها له ڕووی ئاوه‌دانیی و خزمه‌تگوزارییه‌وه، به‌ڵكو له ڕووی پاراستنی ئازادییه‌كان و به‌ها دیموكراسییه‌كانه‌وه، زیاد له پرسیارێك هه‌ڵده‌گرێت.
پرسیاره‌كه‌ش ئه‌وه‌یه: ئایا سلێمانى به‌ره‌و ئاینده‌یه‌ك ده‌چێت كه هاوشێوه‌ی بارودۆخی هه‌ولێر (له ڕووی ئاوه‌دانییه‌وه) بێت به‌بێ ئازادییه‌كان؟ یان به‌ره‌و بارودۆخێك ده‌ڕوات كه ئازادییه‌كان تیایدا به ته‌واوی سنووردار بكرێن، وه‌ك ئه‌وه‌ی له بادینان ڕوویانداوه؟ یاخود ده‌توانێت ئه‌و سیمایه‌ی پێشووی خۆی وه‌ك ناوه‌ندێكی ئازادیی و پێشكه‌وتوو بپارێزێت؟