تاوانێکی نهێنی لە گەرمیان: کوژرانی ئەکبەر حاجی ڕۆستەم و شوێنپێی ونبووی بکوژەکە

پەنجەرە

شەوی ڕابردووی ناوچەی گەرمیان، بە هەواڵێکی دڵتەزێن و شۆکهێنەرەوە کۆتاییهات. ئەکبەری حاجی ڕۆستەم، کادری دیاری پارتی دیموکراتی کوردستان و کەسایەتییەکی ناسراوی ناوچەکە، لە گوندی ئۆمەربلی سەر بە ناحیەی سەرقەڵا بە شێوەیەکی گوماناوی کوژرا.

ئەم ڕووداوە کاردانەوەیەکی بەرفراوانی لەسەر ئاستی شەقام و گۆڕەپانی سیاسیدا لێکەوتەوە و مەسرور بارزانی، سەرۆکی حکومەتی هەرێم، داوای کردووە بە زووترین کات دەستی پشت ئەم تاوانە ئاشکرا بکرێت.

ورده‌كارییه‌كانی كاتژمێره‌ سه‌ره‌تاییه‌كان

بەپێی بەدواداچوونەکانی پەنجەرە کە لە چەند سەرچاوەیەکی ئاگادار و جیاوازەوە دەستی کەوتوون، ئەکبەری حاجی ڕۆستەم دوای ئەوەی لە بەنزینخانەیەکی کفری بەنزینی کردووەتە ئۆتۆمبیلەکەی، کاتژمێر (٥:٢٠)ی ئێوارە بە خێرایی بەرەو گوندی ئۆمەربل بەڕێکەوتووە.

سەرچاوەکان ئاماژە بەوە دەکەن، کاتژمێر (٥:٤٢) خولەک گەیشتووەتە ناحیەی سەرقەڵا و بەهەمان خێرایی بەرەو گوندەکەی ڕۆیشتووە و لە دەوروبەری کاتژمێر شەشی ئێوارە گەیشتووەتە ئۆمەربل.

ئەکبەر حاجی ڕۆستەم ڕاستەوخۆ نەچووەتە نێو گوندەکە، بەڵکو پێش گەیشتن بە گوندی ئۆمەربل، لە ڕێگایەکی خاکیدا لایداوە و بەرەو سەر زەوی و زارەکەی ڕۆیشتووە.

گومان دەکرێت، لەگەڵ گەیشتنی و لە دەوروبەری کاتژمێر شەشی ئێوارە، ڕووبەڕووی چارەنووسی خۆی بووبێتەوە و کوژرابێت، هەرچەندە خێزانەکەی درەنگ بە ڕووداوەکەیان زانیووە و لە دەوروبەری کاتژمێر (١١)ـی شەو تەرمەکەیان دۆزیوەتەوە.

هەڵهاتنێکی شاراوە: شوێنپێی تاوانبارەکە

دوای ئەنجامدانی تاوانەکە، بکوژەکە ئۆتۆمبێلی قوربانییەکەی لەگەڵ خۆی بردووە و بە ڕێگایەکی تری خاکیدا ناوچەکەی بەجێهێشتووە.

زانیارییە نوێیەکان دەریدەخەن کە تاوانبارەکە بە ناوچەی زنانەدا نەڕۆیشتووە، بەڵکو ڕێگەی سەرقەڵای گرتووەتەبەر و بەرەو گوندی دوانزە ئیمام بەڕێکەوتووە، ئەمەش بەو پێیەی ئەو ڕێگەیە هیچ بازگەیەکی تێدا نییە.

سەرچاوەکان باس لەوە دەکەن، تاوانبارەکە بە ئۆتۆمبێلەکەی ئەکبەر حاجی ڕۆستەم بە نێو گوندی دوانزە ئیمام و دواتر گوندی سەرچەمدا تێپەڕیووە. لە کاتی نزیکبوونەوەش لە کامێراکانی چاودێری، هەوڵیداوە خۆی بشارێتەوە و لە دیدی کامێراکان دوور بکەوێتەوە.

هەرچەندە ئەو ڕێگەیەی تاوانبارەکەی پێدا ڕۆیشتووە لق و پۆی زۆری لێدەبێتەوە، بەشێک لە سەرچاوەکان پێیانوایە بەرەو ناحیەکانی جەبارە و قەرەتەپە ڕۆیشتووە، بەڵام بەشێکی دیکە گومان دەکەن بەرەو ناوچەی قوڕی چای و خورماتوو هەڵهاتبێت.

لێکۆڵینەوە چڕەکان و گومانەکان

دەزگا ئەمنییەکانی ناوچەی گەرمیان بە چڕی سەرقاڵی لێکۆڵینەوەن. کامێرای چاودێری ڕێگەوبانەکانیان کۆکردووەتەوە و دەیانەوێت بگەنە سەرەداوەکان بۆ ئاشکراکردنی تاوانبارەکە.

لایەنە پەیوەندیدارەکان پێیانوایە، تاوانبارەکە شارەزاییەکی باشی لە جوگرافیای ناوچەکە و ڕێگەوبانەکاندا هەبووە، بۆیە هەوڵیداوە لە کامێراکانی چاودێری خۆی بدزێتەوە و بەو ڕێگانەشدا نەڕوات کە بازگەیان تێدایە.

سەرچاوە ئاگادارەکان بە چەند ئاراستەیەکدا گومان لە چۆنیەتی ڕووداوەکە و دەستی پشت تاوانەکە دەکەن، بەڵام تائێستا لێکۆڵینەوەکان بەردەوامن و لایەنە پەیوەندیدارەکان دەیانەوێت لە ڕێگەی بەڵگەوە بگەنە ڕاستی و دەستی پشت ئەم تاوانە ئاشکرا بکەن.

ئەم ڕووداوە نائاساییە پرسیارێکی زۆری لەبارەی ئاسایشی ناوچەکە و هۆکاری ڕووداوەکە دروست کردووە، چاوەڕوان دەکرێت لە ڕۆژانی داهاتوودا زانیاری زیاتر لەبارەی ئەم دۆسییەوە بڵاوبکرێتەوە، کە بووە بە دۆسێیەکی جێ بایەخ نەک هەر لە گەرمیان، بەڵکو لەسەر ئاستی هەرێمی کوردستانیش.