وتەبێژی حکومەت زانیاریەکی پەنجەرە پشتڕاست دەکاتەوە
١١ ئەیلوول ٢٠٢٥ - ٩:٥٦ پاش نیوەڕۆ
پەنجەرە
وتەبێژی حکومەتی هەرێمی کوردستان ڕایدەگەیەنێت لەئەگەری ڕێکنەکەوتندا لەگەڵ حکومەتی عێراق، لە پرۆسەی سیاسی دەکشێنەوە و بەشداری هەڵبژاردن ناکەن، ئەوەش لەکاتێکدایە ئێوارەی ئەمڕۆ پەنجەرە بڵاویکردەوە کە یەکێتی و پارتی گفتووگۆیان لەسەر بەشدارینەکردن لەهەڵبژاردنی عێراق کردووە، ئەگەر لەگەڵ عێراق ڕێکنەکەون.
پێشەوا هەورامانی، وتەبێژی حکومەتی هەرێم، بە ماڵپەڕی پارتی ڕاگەیاندووە: هیوامان وایە لەگەڵ عێراق ڕێکبکەوین، بەڵام ئەگەر ڕێکنەکەوین کۆمەڵێک بژاردەمان لەبەرەستدایە، لەوانە بەشدارینەکردنی هەڵبژاردن و کشانەوە لە پرۆسەی سیاسی.
ئێوارەی ئەمڕۆ، پەنجەرە ڕاپۆرتە هەواڵێکی بڵاوکردەوە بەناونیشانی "کێشەی نێوان هەرێم و بەغدا هەڵبژاردن دەکاتە ئامانج".
لە ڕاپۆرتە هەواڵەکەدا هاتبوو: "پارتی دیموکراتی کوردستان، بەشداریی نەکردنی لە هەڵبژاردن تاوتوێکردووە و پێیوایە ئەگەر عێراق موچەی مانگەکانی داهاتوو نەنێرێت، نابێت هەڵبژاردن ئەنجام بدرێت، بەڵام یەکێتی نیشتمانی کوردستان، ڕای جیاوازی هەبووە لەم بارەیەوە."